Կրակոց Երևանում. «Արաբկիր Ալկոյի» տերը տեղափոխվել է հիվանդանոց (ՖՈՏՈ)

Այսօր` նոյեմբերի 4-ին կրակոց է հնչել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 16.20-ի սահմաններում Արաբկիրի ոստիկանություն ահազանգ է ստացվել Զեյթունի 8-րդ հիվանդանոցից, որ գլխի մասում ստացած վնասվածքով իրենց մոտ է տեղափոխվել մի տղամարդ:

Մինչ ոստիկանության Արաբկիրի օպերատիվ խումբը կմեկներ հիվանդանոց, նույն բաժնում և ոստիկանության կազմակերպված հանցավորության դեմ պայքարի գլխավոր (6-րդ) վարչության քրեական հետախուզության վարչությունում օպերատիվ տեղեկություն են ստանում, որ Քանաքեռ ՀԷԿ-ի տարածքում մի խումբ մարդիկ հավաքվել և վիճաբանում են: Վիճաբանության ընթացքում հնչել է կրակոց:

Օպերատիվ մի խումբ մեկնում է հիվանդանոց, մյուսը` վիճաբանության վայր: Վիճաբանության վայրից Արաբկիրի բաժին բերման են ենթարկվում մի քանի հոգի, այդ թվում` Արաբկիր վարչական շրջանում հայտնի «Կոմիտասցի Մուշեղը»:

Հենց դեպքի վայրում հայտնաբերվում և առգրավվում է որսորդական մեկ հրացան և մեկ կրակված պարկուճ:

Պարզվում է, որ վնասվածք ստացել է 44-ամյա Վարդան Այվազյանը, ով այս պահին գտնվում է բժիշկների հսկողության տակ:

Դեպքի վայրում հավաքվածները ֆոտոլրագրող Գագիկ Շամշյանին հայտնել են, որ վիրավորը «Արաբկիր Ալկո» ընկերության սեփականատերերից է, ում երբ հարվածել են, իր մոտ եղած 12-միլիմետրանոց փող ունեցող հրացանով, որը, ի դեպ, ըստ ֆոտոլրագրողի, օրինական է, իրեն հարվածողներին վախեցնելու համար մեկ անգամ օդ է կրակել:

Փաստի առթիվ ոստիկանության Արաբկիրի բաժնում նյութեր են նախապատրաստվում:

Առգրավված զենքն ու պարկուճը ուղարկվել են ոստիկանության փորձաքրեագիտական կենտրոն:

Լուսանկարները՝ Գագիկ Շամշյանի