«Սուրիկի լավաշ» ընկերության սեփականատիրոջ որդու՝ Արտուշ Հակոբյանի կնոջ կալանքը երկարաձգվեց ևս երկու ամսով

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այսօր` նոյեմբերի 4-ին, Կենտրոն և Նորք-Մարաշ վարչական շրջանների ընդհանուր իրավասության դատարանը' դատավոր Մնացական Մարտիրոսյանի նախագահությամբ, դռնփակ դատական նիստում բավարարեց քննչական մարմնի միջնորդությունը և Մարինա Գեորգաձեի' որպես խափանման միջոց կիրառված կալանքը երկարաձգեց ևս երկու ամսով: Հիշեցնենք, որ Մարինա Գեորգաձեն «Սուրիկի լավաշ» ընկերության սեփականատիրոջ որդու` Արտուշ Հակոբյանի կինն է:

Ինչպես ավելի վաղ հայտնել էր ԼՈՒՐԵՐ.com-ը: Սեպտեմբերի 27-ին Երեւանի Կենտրոն-Նորք Մարաշ վարչական շրջանների ընդհանուր իրավասության դատարանում ավարտվեել էին դռնփակ դատական նիստերը: Ինչպես դատարանից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, նշված դատարան էին տեղափոխվել Քյարամ Ամոյանը, Ռուբեն Կարօղլանյանը եւ Արտուշ Հակոբյանը: Ոստիկանության քննչական գլխավոր վարչության քննիչը դիմել էր նշված դատարան, որպեսզի երկամսյա կալանք կիրառվի հիշատակված անձանց նկատմամբ: Դատավոր Մխիթար Պապոյանը դռնփակ առանձին դատական նիստեր անցկացնելուց հետո վերադառնալով խորհրդակցական սենյակից բավարարեց քննչական մարմնի միջնորդությունը: Հիշեցնենք որ ՀՀ ոստիկանության քրեական հետախուզության գլխավոր վարչության ստացած օպերատիվ տվյալների հիման վրա նշված վարչությունը, ոստիկանության Կազմակերպված հանցավորության դեմ պայքարի գլխավոր վարչության, Երևանի վարչության և ոստիկանության Երևանի բոլոր բաժինների աշխատակիցների հետ, հայտնաբերել ու ձերբակալել են մեծ թվով անձանց, որոնց մոտ հայտնաբերվել է զենք, զինամթերք, դիմակներ, ինքնաձիքեր, ատրճանակներ: Նշված անձինք կասկածվում էին վերջին ժամանակներս հանրապետությունում տեղի ունեցած մի քանի աղմկահարույց հանցագործություններ կատարելու մեջ: Ֆոտոլրագրողին հայտնի է դարձել, որ Քյարամ Ամոյանը հանցագործ աշխարհում հայտնի օրենքով գող եզդի Ճակոյի քրոջ որդին է: Իսկ Արտուշ Հակոբյանը որպես փոխտնօրեն աշխատում է «Գառնի Սուրիկ լավաշ» ՍՊԸ-ի փոխտնօրեն: Վերջինս նախկինում մի քանի անգամ դատապարտված է եղել, նույնիսկ կարողացել է փախուստի դիմել կալանավայրից: Ի դեպ, նույն օրը նշված դատարանի դատավոր Արմեն Բեկթաշյանը 40 օրվա կալանքի որոշում էր կայացրել Արտուշ Հակոբյանի կնոջ' Մարինա Գեորգաձեի նկատմամբ, որն, ըստ տեղեկությունների, որոնվում էչ Վրաստանի իրավապահների կողմից: Դատական դռնփակ նիստի ողջ ընթացքում դատարանը վերցվել էր ուժեղացված հսկողության տակ:

Լուսանկարները և տեսանյութը' Գագիկ Շամշյանի: