Ավտովթար Սարալանջի ճանապարհին. «Ինֆինիտին» հայտնվել է սեփական տան բակում. կան վիրավորներ (ՖՈՏՈ, ՏԵՍԱՆՅՈՒԹ)

Այսօր` նոյեմբերի 5-ին, ավտովթար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 10.30-ի սահմաններում Երևանի Սարալանջի նորակառույց ճանապարհին «Ինֆինիտի FX35» մակնիշի 33 ՈՈ 133 համարանիշի ավտոմեքենայի վարորդը` 19-ամյա Ալեքսանդր Հովհաննիսյանը դուրս է եկել ճանապարհի բանուկ մասից, հարվածել բետոնե պատնեշներին, այնուհետև բախվել երկաթե սյանը, կոտրել մի քանի ծառ և մոտ 5-6 մետր մտել սեփական տան այգու տարածք:

Վթարի հետևանքով վարորդը` Ա.Հովհաննիսյանը, և ուղևորուհին` Հայ-ռուսական (Սլավոնական) համալսարանի 3-րդ կուրսի ուսանողուհի, 19-ամյա Լիլյա Սիմոնյանը, մարմնական վնասվածքներով տեղափոխվել են հիվանդանոցներ:

Դեպքի վայր էին ժամանել Երևանի Ճանապարհային ոստիկանության աշխատակիցները` Երևանի ՃՈ պետի տեղակալ Հայկազ Մաթևոսյանի գլխավորությամբ:

Վթարի վայրում քննչական աշխատանքները ղեկավարում էր ոստիկանության քննչական գլխավոր վարչության Երևանի քննչական վարչության Ճանապարհատրանսպորտային հանցագործությունների քննության բաժնի քննիչ Անդրանիկ Փարսադանյանը:

Նրա հանձնարարականով, ավտոմեքենան տեղափոխվեց Երևանի ՃՈ տուգանային հրապարակ:

ՃՏՀ քննության բաժնում նյութեր են նախապատրաստվում:

Լուսանկարները և տեսանյութը` Գագիկ Շամշյանի