Ինքնասպանություն՝ Արարատի մարզում. 78-ամյա ծերունին դեռևս չպարզված թունաքիմիկատ է խմել

Նոյեմբերի 3-ին ինքնասպանություն է տեղի ունեցել Արարատի մարզում:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այդ օրը Արտաշատի շտապօգնության կայանից ոստիկանության Արտաշատի բաժին ահազանգ էր ստացվել, որ շտապօգնության ավտոմեքենան մեկնել է Քաղցրաշեն գյուղ` գյուղի բնակիչ 78-ամյա Շահվալար Հայրապետյանին բուժօգնություն ցույց տալու նպատակով, սակայն հայտնաբերել են թոշակառու ծերունուն արդեն մահացած վիճակում:

Շտապ դեպքի վայր է մեկնել ոստիկանության Արտաշատի բաժնի օպերատիվ խումբը` քննիչ Նիկոսյանի գլխավորությամբ: Օպերատիվ խումբը պարզում է, որ նույն օրը ժամը 11.00-ի սահմաններում Շ.Հայրապետյանը տանը հանկարծամահ է եղել:

Նախապատրաստված նյութերով և քննիչի հանձնարարականով նշանակված դատաբժշկական փորձաքննությամբ նոյեմբերի 4-ին պարզվել է, որ Շ.Հայրապետյանը նոյեմբերի 3-ին` ժամը 11.00-ի սահմաններում, դեռևս չպարզված թունաքիմիկատ խմելու միջոցով ինքնասպանություն է գործել:

Հարևանները ֆոտոլրագրող Գագիկ Շամշյանին պատմել են, որ ոստիկանները ծերունու տանը հայտնաբերել են երկտող, որտեղ ինքնասպանություն գործած ծերունին գրել է, որ իր մահվան մեջ իր հարսին և թոռներին չմեղադրեն:

Ոստիկանության քննչական գլխավոր վարչության Արարատի մարզի քննչական վարչության Արտաշատի քննչական բաժնում նյութեր են նախապատրաստվում: