ՇՏԱՊ. «Մակարով» տեսակի ատրճանակով ինքնասպան է եղել Հարկային տեսչության աշխատակիցը (ԹԱՐՄԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր՝ նոյեմբերի 5-ին, ինքնասպանություն է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այսօր՝ նոյեմբերի 5-ին, ժամը 12:15-ի սահմաններում ոստիկանության Նոր Նորքի բաժին անհայտ քաղաքացուց ահազանգ է ստացվել, որ Նոր Նորքի 7-րդ զանգավածի շենքերից մեկի մոտ գտնվող ավտոտնակում մի տղամարդ ինքնասպանություն է գործել:

Շտապ դեպքի վայր է մեկնել ոստիկանության Նոր Նորքի բաժնի օպերատիվ խումբը՝ Նոր Նորքի ոստիկանության պետ Մուշեղ Օհանյանի գլխավորությամբ:

Ժամանել էին նաև ոստիկանության քննչական գլխավոր վարչության Երևանի քննչական վարչության Նոր Նորքի քննչական բաժնի քննիչները` քննչական բաժնի պետ Մհեր Վարդանյանի գլխավորությամբ:

Օպերատիվ-քննչական խումբը պարզել է, որ Նոր Նորքի 7-րդ զանգավածի 20 շենքի 22-րդ բնակարանի բնակիչ 39-ամյա Արմեն Գալստյանը իրեն ամրակցված «Մակարով» տեսակի ատրճանակով ինքնասպանություն է գործել իրենց շենքի հարևանությամբ գտնվող ավտոտնակում:

Դեպքի վայրում հավաքավածները ֆոտոլրագրող Գագիկ Շամշյանին հայտնել են, որ ինքնասպան եղած Արմեն Գալստյանը աշխատում էր Քանաքեռ-Զեյթունի տարածքային հարկային տեսչության գանձումների բաժնում:

Ոստիկանների օպերատիվ-քննչական խումբը դեպքի վայրում հայտնաբերել է «Մակարով» տեսակի ատրճանակն ու պարկուճը:

Փաստի առթիվ ոստիկանության քննչական գլխավոր վարչության Երևանի քննչական վարչության Նոր Նորքի քննչական բաժնում քննիչ Ժորա Թովմասյանի կողմից հարուցվել է քրեական գործ` ՀՀ քրօր.-ի 110 հոդվածի (ինքնասպանության հասցնելը) հատկանիշներով: Քննիչի որոշմամբ նշանակվել են մի շարք փորձաքննություններ, այդ թվում` դիակի դատաբժշկական, ձգաբանական, մատնադրոշմային, հետքաբանական:

Ատրճանակն էլ ուղարկվել է ոստիկանության փորձաքրեագիտական կենտրոն:

Լուսանկարները և տեսանյութը` Գագիկ Շամշյանի