Ավտովթար` Կոտայքի մարզում. այրվել է Mercedes G 55-ը, վարորդը հիվանդանոցում մահացել է (ֆոտո)

Նոյեմբերի 5-ին ավտովթար է տեղի ունեցել Կոտայքի մարզում:

ԻՆչպես դեպքի վայրից ԼՈՒՐԵՐ.com-ին հայտնեց ֆոտոլրագրող Գագիկ Շամշյանը ժամը 22:30-ի սահմաններում Սուրբ Գրիգոր Լուսավորիչ բժշկական կենտրոնից ոստիկանության Կոտայքի բաժին հայտնել են, որ վթարի հետևանքով մարմնական վնասվածքներով անգիտակից վիճակում իրենց մոտ են տեղափոխվել մի երիտասարդ:

Կոտայքի բաժնից հիվանդանոց մեկնած օպերատիվ խումբը պարզել է, որ հիվանդանոց տեղափոխված երիտասարդը 27-ամյա Վահե Դավիթի Արտաշյանն է:

Պարզվել է, որ նույն օրը ժամը 21:30-ի սահմաններում Վահե Արտաշյանը, վարելով Գուրգեն Վանեսյանին պատկանող Mersedes Benz մակնիշի G-55 դասի 10 OT 010 համարանիշի ջիփը, Գեղադիր-Գառնի ավտոճանապարհին դուրս է եկել ճանապարհի երթևեկելի մասից և մոտ 30-40 մետր գլորվել ձորը, գլորվելու ժամանակ Վահե Արտաշյանը դուրս է ընկել ավտոմեքենայից, ում էլ հետո տեղափոխել են Սուրբ Գրիգոր Լուսավորիչ բժշկական կենտրոն:

Ավտոմեքենայում վթարի հետևանքով առաջացել է հրդեհ, որը մարելու համար դեպքի վայր են ժամանել ԱԻՆ Հայաստանի փրկարար ծառայության Կոտայքի մարզի փրկարար ծառայության և հրշեջ ծառայության աշխատակիցները:

Ավտոմեքենան տեղափոխվել է ոստիկանության Կոտայքի բաժնի տուգանային հրապարակ:

Փաստի առթիվ, ոստիկանության ՔԳՎ Կոտայքի բաժնի քննչական բաժանմունքում քննիչ Հրանտ Ասոյանի կողմից նյութեր են նախապատրաստվում:

Քիչ առաջ ֆոտոլրագրող Գագիկ Շամշյանը հայտնեց, որ առավոտյան երիտասարդը գիտակցության չգալով հիվանդանոցի վերակենդանացման բաժնում մահացել է:

Լուսանկարները` Գագիկ Շամշյանի