Հայաստանի ու Ռուսաստանի ԱԳ նախարարները քննարկում են Պուտինի Երևան այցի նախապատրաստումը

Դիվանագիտական առաքելություններ 8 Ապրիլ, 2015 13:47

Հայաստանի ու Ռուսաստանի արտաքին գործերի նախարարներ Էդվարդ Նալբանդյանը և Սերգեյ Լավրովն ապրիլի 8-ին Մոսկվայում սկսված բանակցությունների ընթացքում քննարկելու են երկու պետությունների ղեկավարների միջև ավելի վաղ ձեռք բերված պայմանավորվածությունների կատարման ընթացքը, տեղեկացնում է «Արմենպրես»-ը՝ հղում անելով ՏԱՍՍ-ին:

«Ուրախ ենք հերթական հանդիպումն անցկացնելու հնարավորության համար,- ասել է Լավրովը՝ բացելով Հայաստանի իր պաշտոնակցի հետ հանդիպումը:- Մեր միջև ԱԳՆ ղեկավարների կանոնավոր փոխադարձ այցերի ավանդույթ է հաստատվել: Մենք ունենք ընդգրկուն օրակարգ, որը վերաբերում է երկկողմ հարաբերություններին, եվրասիական ինտեգրացմանը, դաշնակցային հարաբերություններին ՀԱՊԿ-ի շրջանակներում, միջազգային կազմակերպությունների, այդ թվում՝ ՄԱԿ-ի և ԵԱՀԿ-ի հարթակներում»: Լավրովը հավելել է, որ ակնկալում է արդյունավետ խոսակցություն՝ ուղղված Հայաստանի և Ռուսաստանի նախագահների միջև ձեռք բերված պայմանավորվածությունների իրագործմանը:

Էդվարդ Նալբանդյանն իր հերթին նշել է, որ այսօրվա հանդիպումը լավ հնարավորություն է՝ քննարկելու լայն շրջանակի հարցեր: «Խոսքը թե տնտեսական համագործակցության, թե խորհրդարանական չափման մասին է,- ասել է նա:- Հաջող փոխգործակցություն է ընթանում պաշտպանական գերատեսչությունների միջև, շարունակվում է ռազմատեխնիկական համագործակցությունը»: «Մենք կօգտվենք այս առիթից՝ կարծիքներ փոխանակելու տարածաշրջանային հարցերի շուրջ և, իհարկե, քննարկելու ղարաբաղյան հակամարտության կարգավորման գործընթացը»,- հավելել է նա:

Նալբանդյանն ընդգծել է, որ կողմերը կքննարկեն հայոց ցեղասպանության տարելիցի կապակցությամբ ՌԴ-ի նախագահ Վլադիմիր Պուտինի՝ Հայաստան հնարավոր այցի նախապատրաստումը:

«Այսօր մենք հնարավորություն ունենք հանգամանորեն քննարկելու երկկողմ հարաբերությունների օրակարգը: Մենք շուտով մեզ մոտ սպասում ենք ՌԴ նախագահ Վլադիմիր Պուտինին՝ մասնակցելու հայերի ցեղասպանության տարելիցի միջոցառումներին, այդ կապակցությամբ քննարկվելու են կազմակերպչական հարցեր»,- ասել է ՀՀ արտգործնախարարը և հավելել, որ պետությունների ղեկավարները կհանդիպեն նաև մայիսին Մոսկվայում Հաղթանակի 70-ամյակի տոնակատարության միջոցառումների ժամանակ: