Ոստիկանության բարձր օղակներում կաշառակերության դեպք է բացահայտվել

Ինչպես ԼՈւՐԵՐ.com-ին հայտնեց ֆոտոլրագրող Գագիկ Շամշյանը, օրերս ոստիկանության կազմակերպված հանցավորության դեմ պայքարի գլխավոր վարչությունում հայտարարություն էր ստացվել երկու քաղաքացիներից այն մասին, որ իրենք պատասխանատվությունից ազատվելու նպատակով դիմել էին ՀՀ ոստիկանության շտաբի Բարեփոխումների մշակման և ծրագրերի համակարգման բաժնի ավագ տեսուչ Կարեն Խաչատրյանին, նա էլ՝ ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանին:

 Իսկ դեպքը հետևյալն է եղել ՀՀ ԱՆ «Նուբարաշեն» ՔԿՀ-ում գտնվող մի դատապարտյալի թմրանյութ փոխանցելու փաստի առնչությամբ ՔԿՀ-ում նրանց վերաբերյալ նյութեր էին նախապատրաստվել և ուղարկվել ոստիկանության Էրեբունու քննչական բաժին:

Պատասխանատվությունից ազատվելու նպատակով Քեշիշյանի պահանջով քաղաքացիները Կ. Խաչատրյանին են տվել 13.000 ԱՄՆ դոլար կաշառք, որից նա 1.000 դոլար վերցրել է իր ծառայությունների դիմաց, իսկ մնացածը տվել է Միհրան Քեշիշյանին:

Կ. Խաչատրյանն ընդունել է գումարը վերցնելու և Միհրան Քեշիշյանին փոխանցելու փաստը:

Նախապատրաստված նյութերն ուղարկվել են ՀՀ ՀՔԾ` հետագա ընթացքը լուծելու համար: Հիշեցնենք որ ՀՀ ոստիկանության պետ Վլադիմիր Գասպարյանը, իր նշանակման օրվանից հանդիպել էր ոստիկանության կառույցների ու վարչությունների բոլոր ղեկավարների հետ ու հայտնել որ համակարգում շարունակվելու են բարեփոխումները ու առավել թափանցիկ է դարձվելու ոստիկանության աշխատանքը: Ոստիկանապետը հատկապես կարևորել էր պայքարը կոռուպցիայի ու հոռի երևույթների դեմ, ու ցանկացած դեպք դառնալու է լուրջ քննարկման առարկա, իսկ յուրաքանչյուր հակաիրավական արարք համակարգում, պատժվելու է: