Միջքաղաքային տրանսպորտի նորամուծությունն Աշտարակում հանգեցրել է ինքնաբուխ ցույցի (ՖՈՏՈ, ՏԵՍԱՆՅՈՒԹ)

Այսօր` նոյեմբերի 7-ին, ինքնաբուխ ցույց է տեղի ունեցել Աշտարակում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, առավոտյան` ժամը 8.30-ի սահմաններում, Աշտարակի կենտրոնական ավտոկայարանում 400-500 հոգի մարդ էր հավաքվել, որոնք հիմնականում Արագածոտնի մարզի բնակիչներ էին` ուսանողներ:

Հավաքվածները պահանջում էին, որ Աշտարակից Երևան եկող հանրային տրանսպորտը` թիվ 502, 503, 519, 522 երթուղիները, Երևանում ոչ թե ավտոկայարանում ավարտեն իրենց երթուղին, այլ քաղաքի մեջ` նախկինում եղած կանգառներում:

Ուսանողներն ասում էին, որ նախ` տրանսպորտային նորամուծության արդյունքում իրենք ուշանում են դասերից, ապա նաև` օրական հավելյալ 200 դրամը, որ իրենք տալիս են Երևանում ներքաղաքային տրանսպորտից օգտվելու համար, ֆինանսական լուրջ դժվարություններ է հարուցում:

Ֆոտոլրագրող Գագիկ Շամշյանը հայտնում է, որ ինքնաբուխ ցույցի վայր էին ժամանել ոստիկանության Աշտարակի բաժնի աշխատակիցները` բաժնի պետ Արմեն Իսրայելյանի գլխավորությամբ:

Բողոքող ուսանողների հետ է հանդիպել Աշտարակի քաղաքապետարանի ներկայացուցիչը, ով ցույցի մասնակիցներին խոստացել է, որ իրենք համապատասխան խնդրանքով կդիմեն Երևանի քաղաքապետարանին` խնդիրը հնարավորինս ուսանողների օգտին լուծելու համար:

Լուսանկարները և տեսանյութը` Գագիկ Շամշյանի