Պայթյուն «Կայզեր» սուպերմարկետի հետնամասում գտնվող ավտոտնակներից մեկում, կան վիրավորներ

Այսօր ապրիլի 10-ին արտակարգ պատահար է տեղի ունեցել Երևանում։ Ինչպես հայտնում է ֆոտոլրագրող Գագիկ Շամշյանը, ժամը 17.00–ի սահմաններում ահազանգ է ստացվել ՀՀ Արտակարգ իրավիճակների նախարարության Փրկարար ծառայության հակաճգնաժամային կառավարման կենտրոն, որ, ըստ նախնական տեղեկությունների, Անդրանիկի 142 հասցեում «Կայզեր» սուպերմարկետի հետնամասում գտնվող ավտոտնակներից մեկում պայթյուն է տեղի ունեցել։

Դեպքի վայր են մեկնել ԱԻՆ Երևանի փրկարար ծառայության հրշեջ–փրկարարական ջոկատի հատուկ փրկարարներից կազմված 2 մարտական հաշվարկ՝ թիվ 1 հրշեջ–փրկարարական ջոկատից, մեկական մարտական հաշվարկ էլ՝ թիվ 4 և 7 հրշեջ–փրկարարական ջոկատից։ Տեղում է նաև Երևանի փրկարարական վարչության պետ գնդապետ Մուշեղ Ղազարյանը։

Ֆոտոլրագրողին հայտնի է դարձել, որ նշված վայրից քիչ առաջ 1-03 շտապօգնության ավտոմեքենան 3 հոգու, որոնցից մեկը մոտ 45 տարեկան անձնավորություն է եղել, տարբեր աստիճանի այրվածքներով տեղափոխել են Երևանի այրվածքաբանական կենտրոն։ Գ. Շամշյանին հայտնի է դարձել, որ նշված անձինք այրվածքներ են ստացել դյուրավառ հեղուկի բալոնների պայթյունի հետևանքով։ Պայթյունի հետևանքով պոկվել է նաև դարպասը և փլուզվել են ավտոտնակների միջև եղած բաժանարար բետոնե պատերը։

Տեղում է Ոստիկանության Մալաթիայի բաժնի օպերատիվ քննչական խումբը, որը փորձում է պարզել վիրավորների ինքնությունը։

Aravot.am