Հայաստանյան պատվիրակությունը հանդիպումներ է ունեցել Սիրիայի վարչապետի և ԱԳ նախարարի հետ

Հայաստան-Սիրիա բարեկամության խորհրդարանական խմբի պատվիրակությունը Տաճատ Վարդապետյանի գլխավորությամբ Սիրիայում հանդիպում է ունեցել վարչապետ Ուաիլ ալ Հալկիի և Արտաքին գործերի նախարար Ուալիդ ալ Մուալեմի հետ:

Ինչպես հաղորդում է «Արմենպրես»-ը' վկայակոչելով սիրիական ՍԱՆԱ գործակալությունը, վարչապետի հետ հանդիպման ընթացքում քննարկվել են երկու երկրների միջև համագործակցության հարաբերությունները և դրանք ակտիվացնելու ուղիները:

Վարչապետ ալ Հալկին հայ գործարարներին և ընկերություններին կոչ է արել համագործակցել' ստեղծելով զարգացնող նախագծեր, և մասնակցել երկրի վերականգնմանը:

Նա նաև նշել է, որ դաժան և զանգվածային սպանությունները, որոնք Էրդողանի գլխավորությամբ իրականցնում են նոր օսմանցիները, հիշեցնում են դաժան հանցագործությունները, որոնք կատարել են նրանց նախնիները հայ ժողովրդի դեմ:

Հանդիպմանը ներկա են գտնվել Սիրիայի հայազգի նախարար Նազիրա Սարգիսը, նաև Սիրիայում ՀՀ դեսպան Արշակ Փոլադյանը:

Սիրիայի ԱԳ նախարար Ուալիդ ալ Մուալեմը նշել է, որ ահաբեկչությունը լուրջ սպառնալիք է ստեղծում տարածաշրջանի և միջազգային անվտանգության ու կայունության համար՝ կոչ անելով միջազգային հանրությանը ճնշում գործադրել ահաբեկչությանն աջակցող երկրների վրա, հատկապես Թուրքիայի, Կատարի, Սաուդյան Արաբիայի, որպեսզի սահմանափակեն նրանց ոչնչացման քաղաքականությունը և հետևեն ՄԱԿ-ի որոշումներին՝ հատկապես ահաբեկչության դեմ պայքարի վերաբերյալ:

Ավելի վաղ պատվիրակությունը հանդիպում էր ունեցել Սիրիայի նախագահ Բաշար ալ Ասադի հետ: