Իրանում ՀՀ դեսպանն ընդգծել է հայ-իրանական տնտեսական կապերի աշխուժացման անհրաժեշտությունը

Հայաստանը կարևորում է հայ-իրանական հարաբերությունների բարձր մակարդակը և տնտեսական հարաբերությունների աշխուժացման անհրաժեշտություն տեսնում: Այս մասին Իրանի Մեջլիսի ազգային անվտանգության և արտաքին քաղաքականության հանձնաժողովի նախագահ Ալաեդին Բորուջերդիի հետ հանդիպման ժամանակ ասել է Իրանում ՀՀ դեսպան Արտաշես Թումանյանը:

Դեսպան Թումանյանը շնորհակալություն է հայտնել Իրանի իշխանություններին' հայ համայնքի հանդեպ ցուցաբերած ջերմ վերաբերմունքի և հայկական պատմամշակութային կոթողների նկատմամբ հատուկ խնամքի համար:

Ողջունելով դեսպան Թումանյանին' Ալաեդին Բորուջերդին գոհունակություն է հայտնել հայ-իրանական բարձր մակարդակի քաղաքական երկխոսության և միջխորհրդարանական համագործակցության առնչությամբ: Նա առանձնահատուկ ընդգծել է Իրանի հայ համայնքի դերն ու ունեցած մեծ ներդրումը երկրի զարգացման գործում:

Հանդիպման ընթացքում քննարկվել են տարածաշրջանային խնդիրներ և երկու կողմերն էլ մտահոգություն են հայտնել Մերձավոր Արևելքում ծայրահեղականության և ահաբեկչական ալիքի տարածման շուրջ: Արտաշես Թումանյանը շեշտել է տարածաշրջանում առկա խնդիրների' բացառապես քաղաքական ճանապարհով լուծման անհրաժեշտությունը և այդ ուղղությամբ Հայաստանի որդեգրած կառուցողական ու հավասարակշիռ քաղաքականությունը: