ԵԱՏՄ-ին Ղրղզստանի անդամակցումը շահեկան կլինի Հայաստանի համար

Ղրղզստանի անդամակցությունը Եվրասիական տնտեսական միությանը դրական ազդեցություն կունենա Հայաստանի տնտեսության վրա: Ղրղզստանի 6 միլիոնանոց շուկայում Հայաստանն անելիքներ ունի իր արտադրանքը մրցունակ դարձնելու առումով: Այս մասին Ազգային ժողովում Եվրասիական տնտեսական միությանը Ղրղզստանի անդամակցության պայմանագրին Հայաստանի միանաու արձանագրության քննարկման ժամանակ նշեց ԱԺ փոխնախագահ Էդուարդ Շարմազանովը: «Մենք բազմիցս նշել ենք, որ Հայաստանը պետք է խորացնի համագործակցության շրջանակները Եվրասիական տնտեսական միության շրջանակներում, և, այո, տնտեսական առումով Հայաստանի համար շահեկան կլինի 6 միլիոնանոց շուկան: Եթե որևէ մեկն այն կարծիքին է, որ մենք անելիք չունենք 6 միլիոնանոց շուկայում, ես կլռեմ: Սակայն կարող եմ ասել, որ այդ շուկայում մենք ունենք շատ անելիքներ, և այդ առումով թե՚ կառավարությունը, թե՚ պատգամավորները, թե՚ բիզնես հանրությունը շատ լուրջ գործ ունեն անելու, որպեսզի այդ շուկան հետաքրքիր լինի հայկական արտադրողի համար»,- «Արմենպրես»-ի հաղորդմամբ՝ նշեց Շարմազանովը:

Անդրադառնալով քննարկումների ընթացքում մի խումբ պատգամավորների ելույթներին՝ նա նախ համաձայնեց ԲՀԿ խմբակցության քարտուղար Նաիրա Զոհրաբյանի հետ, որ քննարկման ընթացքում տպավորություն էր, թե Ազգային ժողովում քննարկվում է ոչ թե Եվրասիական տնտեսական միությանը Ղրղզստանի, այլ Հայաստանի անդամակցության հարցը: «Ես կարծում եմ, որ անցած ժամանակահատվածը բավարար է, որպեսզի մենք կարողանանք գնահատել՝ շահավե՞տ էր արդյոք Հայաստանի համար անդամակցումը Եվրասիական տնտեսական միությանը: Եվ, այո, կարող ենք ասել, որ Հայաստանի անդամակցումը Եվրասիական տնտեսական միությանը շահավետ էր, և ժամանակը ցույց տվեց, որ դա եղավ ճիշտ տեղին և ժամանակին: Երբ ես լսում եմ մեր ընդդիմադիր որոշ գործընկերների ելույթները, ինձ մոտ տպավորություն է ստեղծվում, որ մենք 2013թ. քնել ենք և 2015թ. զարթնել ենք քնից: Հարգելի՚ գործընկերներ, 2013-2015թթ ընթացքում աշխարհում շատ բան է փոխվել, մեր տարածաշրջանն էլ կանգնած է լուրջ մարտահրավերների առաջ: Այդ մարտահրավերները չեն կարող ուղղակի ազդեցություն չունենալ Հայաստանի վրա: Իսկ ի՞նչ է, ձեզ թվում է, որ եթե Հայաստանը չանդամակցեր Եվրասիական տնտեսական միությանը, երկրի տնտեսակա ն և քաղաքական վիճակն ավելի լա՞վն էր լինելու. Ո՚չ, ես կարող եմ վստահեցնել, որ մի քանի անգամ ավելի վատ էր լինելու, քան հիմա կա»,- ընդգծց ԱԺ փոխնախագահը:

Նա ևս մեկ անգամ շեշտեց, որ Հայաստանի անդամակցումը Եվրասիական տնտեսական միությունը եղել է ճիշտ ժամանակին, և այդ միության անդամ դառնալու որոշումը շատ ճիշտ է եղել: Շարմազանովը հավելեց, որ ԵԱՏՄ-ին Ղրղզստանի անդամակցումը ևս հնարավորություն է հայկական արտադրանքը 6 միլիոնանոց շուկայում մրցունակ դարձնելու համար: