Թուրքիայի պետական կառույցները դեմ են եղել Գյուլի այցին Հայաստան. բացահայտումներ

Թուրքիայի նախկին նախագահ Աբդուլլահ Գյուլի այցը Հայաստան 2008 թվականին ցանկալի չի եղել երկրի արտաքին գործերի նախարարության, Զինված ուժերի գլխավոր շտաբի պետի և այն ժամանակվա վարչապետ Ռեջեփ Թայիփ Էրդողանի կողմից: Ինչպես հաղորդում է «Արմենպրես»-ը' վկայակոչելով Ստամբուլի հայկական «Ակոս» պարբերականը, այս մասին հայտնել է Գյուլի երկար տարիների գլխավոր խորհրդական Ահմեդ Սևերը, ում հեղինակած «12 տարի Աբդուլլահ Գյուլի հետ» խորագրով գիրքը լույս է տեսել օրերս:

Թուրքական հեռուսաալիքներից մեկին հյուրընկալվելու ժամանակ Սևերը պատմել է գրքում տեղ գտած հայ-թուրքական ֆուտբոլային դիվանագիտության վերաբերյալ մանրամասներ, որոնք նախկինում հրապարակված չեն եղել: Անդրադառնալով Երևան նախատեսված Գյուլի այցին' Սևերը նշել է. «Մի ընդունելության ժամանակ այդ շրջանի վարչապետ Թայիփ Էրդողանը պարոն Գյուլի խորհրդականներից մեկին ցույց է տվել ԶՈՒ գլխավոր շտաբի պետ Իլքեր Բաշբուղին՝ ասելով. «Հայաստան գնալուն նա էլ է դեմ»: Սակայն Գյուլը, չնայած մենակ էր մնացել, գնաց, և այդ գործընթացը դարձավ արձանագրությունների ստորագրման սկիզբը»:

Սևերը խոստովանել է, որ Գյուլը քրդական, հայկական և կիպրական հարցերը շատ էր կարևորում: Նա պատմել է, որ Թուրքիայի նախկին նախագահը «հույս է ունեցել, որ ֆուտբոլային դիվանագիտությունը նոր փուլ կարող է բացել երկու երկրի հարաբերություններում»: «Արտգործնախարարությունը չէր ուզում, որ նա գնա: Նրանք մտահոգ էին, որ այցը կարող է վնասակար լինել անվտանգությանը և Ադրբեջանի հետ հարաբերություններին»,- հայտնել է Սևերը:

«Աբդուլլահ Գյուլի հետ 12 տարի. ապրեցի, տեսա, գրեցի» անունը կրող գիրքը բաղկացած է 208 էջից: Գրքում Գյուլի խորհրդականը բացահայտել է նախկինում չլուսաբանված շատ դեպքեր, ինչպես, օրինակ, Գյուլ-Էրդողան ներքին հակասությունները, մանրամասներ Գեզիի դեպքերի, 2013թ. դեկտեմբերի 17-25-ը երկիրը ցնցած «Մեծ կաշառք» գործի վերաբերյալ, պատմել է Թուրքիայի նախկին նախագահի զղջումների և «երանիների» մասին: Գրքում կան հատվածներ սիրիահայերին Թուրքիա տանելու նպատակով պատրաստված գաղտնի ծրագրի վերաբերյալ: