Ադրբեջանի ՊՆ-ն շարունակում է կորած զինծառայողների որոնումները

Երեկ կորած զինծառայողների որոնումները շարունակվում են: Դեռևս որևէ նոր բան չկա:

Այս մասին, ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, հայտարարել է Ադրբեջանի պաշտպանության նախարարության մամուլի ծառայությունը:

Ադրբեջանական կողմը երեկ հայտնել էր, որ երկու պայմանագրային զինծառայողներ՝ կրտսեր սերժանտներ Մուսա Սաբիր օղլու Մուսաևը և Թուրալ Սահիբ օղլու Յոլչուևը Ղազախի շրջանում մոլորվել են լեռնաանտառային գոտում և, նախնական տեղեկություններով, հայտնվել Հայաստանի տարածքում:

Հայաստանի ՊՆ մամուլի քարտուղար Արծրուն Հովհաննիսյանը ֆեյսբուքյան իր էջում հերքել է լուրն այն մասին, որ ադրբեջանցի զինվորներն անցել են հայկական տարածք՝ դրա հետ միասին չբացառելով, որ հնարավոր է՝ նրանք պայթել են ականի վրա:

«Չենք բացառում, որ ադրբեջանցի զինծառայողները կարող էին մոլորվել, ինչը հետևում է Հայաստանի պաշտպանության նախարարություն ուղարկած Կարմիր խաչի երևանյան գրասենյակի միջնորդագրից: Հունիսի 23-ին ժամը 15-ին Կարմիր խաչի միջազգային կոմիտեի երևանյան գրասենյակը երաշխիքներ ստանալու նպատակով դիմել է ՀՀ պաշտպանության նախարարություն, որպեսզի Տավուշի մարզի Վազաշեն գյուղի սահմանահատվածի դիմաց գտնվող ադրբեջանական ԶՈւ մերձդիրքային հատվածից դուրս բերվեն ականային հավանական վիրավորումներ ստացած երկու ադրբեջանցի զինծառայողների մարմինները: ՀՀ ՊՆ կողմից երաշխիքներ տրվել են անմիջապես, իսկ գործընթացները նման դեպքում ադրբեջանական կողմին հայտնի են»,- գրել է ՀՀ ՊՆ մամուլի քարտուղարը: