Սերժ Սարգսյանն ընդունել է Ավստրիայի ազգային խորհրդի պատգամավոր Ռայնհոլդ Լոպատկային

Նախագահ Սերժ Սարգսյանն այսօր ընդունել է Ավստրիայի ազգային խորհրդի պատգամավոր, Ավստրիայի ժողովրդական կուսակցության (ԱԺԿ) խորհրդարանական խմբակցության նախագահ, ԱԺԿ փոխնախագահ Ռայնհոլդ Լոպատկային:

Սերժ Սարգսյանը ողջունել է հյուրին և Հայաստան նրա այցը կարևորել ինչպես հայ-ավստրիական ավանդական բարեկամական կապերն ամրապնդելու, այնպես էլ միջխորհրդարանական համագործակցությունը նորովի խթանելու առումով: Հանրապետության Նախագահը պատվաբեր է համարել մեր երկրում հյուրընկալել Ավստրիայի խորհրդարանի խորհրդարանական խմբակցության ղեկավարին, ով հաղորդակից է հայ ժողովրդին հուզող հարցերին և իր անձնական ներդրումն է ունեցել Հայոց ցեղասպանությունը ճանաչող և դատապարտող հայտարարության ընդունման գործում։ Նախագահն ընդգծել է, որ Հայոց ցեղասպանության ճանաչմամբ Ավստրիան կարևոր ներդրում կատարեց ցեղասպանությունների և մարդկության դեմ հանցագործությունների կանխարգելման գործում:

Սերժ Սարգսյանը նման հանդիպումները լավ առիթ է համարել նաև միջկուսակցական կապերի ստեղծման և ամրապնդման համար, նկատի առնելով, որ Հայաստանի Հանրապետական կուսակցությունը և Ավստրիայի Ժողովրդական կուսակցությունն անդամակցում են ԵԺԿ-ին, որի շրջանակներում ևս կարող են արդյունավետ փոխգործակցություն ծավալել:

Զրուցակիցները համակարծիք են եղել, որ հումանիտար, մշակութային կապերը երկու ժողովուրդներին կամրջող կարևոր գործոններից են, որոնք մեծապես խթանում են հայ-ավստրիական բարձր մակարդակի հարաբերությունների ամրապնդումն ու առևտրատնտեսական փոխգործակցության զարգացումը:

Ռայնհոլդ Լոպատկան շնորհակալություն է հայտնել Հանրապետության Նախագահին ջերմ ընդունելության համար և ընդգծել, որ իր համոզմամբ, հայ-ավստրիական համագործակցությունն անհրաժեշտ է զարգացնել մի քանի մակարդակներով՝ միջխորհրդարանական, որտեղ բարեկամության խմբում ընդգրկված են բոլոր քաղաքական ուժերի ներկայացուցիչները, առանձին կուսակցությունների միջև, ինչպես նաև Ավստրիայում գործող ԱԺԿ Քաղաքական ակադեմիայի շրջանակներում: Նա պատրաստակամություն է հայտնել իր հնարավորությունների սահմաններում նպաստել այդ համագործակցության խորացմանն ու զարգացմանը: