PKK-ն սպառնում է Բաքու-Թբիլիսի-Ջեյհան նավթատար խողովակաշարին. «Ազատություն»

Տարածաշրջան 30 Հուլիս, 2015 13:06

Վերջին օրերին Թուրքիայի տարածքում պայթեցվել են քրդաբնակ Շըրնաք նահանգով անցնող Իրաքի Քիրքուք քաղաքից Թուրքիայի Յումուրթալըք նավահանգիստ նավթ մղող խողովակաշարը և Իրանի հետ սահմանակից Աղրը նահանգում իրանա-թուրքական գազատար խողովակաշարը:

Ինչպես հաղորդում է «Արմենպրես»-ը, «Ազատություն» ռադիոկայանի ադրբեջանական ծառայությունը հայտնել է, որ դեռևս ոչ ոք չի ստանձնել այդ պայթյունների պատասխանատվությունը, սակայն Թուրքիայի էներգետիկայի և բնական պաշարների նախարար Թաներ Յըլդըզը միջադեպերից անմիջապես հետո հայտարարել է, որ դա քուրդ անջատողականների' Քուրդիստանի աշխատավորական կուսակցության (PKK) զինյալների դիվերսիան է:

«Անջատողական ահաբեկչական կազմակերպությունը նպատակադրվել է խախտել երկրի կայունությունը և ազգային անվտանգությունը», -ասել է Յըլդըզը:

«Ազատություն»-ը հաղորդել է, որ քրդերի հետ խաղաղությունն ընդհատվել է այն բանից հետո, երբ անցյալ շաբաթ թուրքական ավիացիան ռմբակոծել է Իրաքի հյուսիսում PKK-ի 7 ճամբարները:

«Քրդերի առաջնորդները բազմիցս սպառնացել են պայթեցնել Բաքու-Ջեյհան ռազմավարական նավթամուղը: Մի անգամ դա նրանց հաջողվել է 2008 թվականի օգոստոսի 7-ին: Քրդերի ռազմաբազաների վրա ավիահարվածների, նրանց ակտիվիստների զանգվածային ձերբակալությունների և այդ գործողությունում ԱՄՆ-ի մասնակցության ֆոնին Բաքու-Ջեյհանի նկատմամբ սպառնալիքն ավելի քան լուրջ է դառնում»,- ընդգծել է ռադիոկայանը: