Ստենֆորդը XXI դարում աշխարհին ամենից շատ նոբելյան դափնեկիրներ է տվել

ԱՄՆ-ի Ստենֆորդի համալսարանն աշխարհում առաջին տեղն Է զբաղեցրել այդ ուսումնական հաստատության հետ կապված նոբելյան դափնեկիրների թվով, որոնք հեղինակավոր մրցանակին են արաժանացել XXI դարում: Այս մասին, ինչպես տեղեկացնում է «Արմենպրես»-ը, ասված է հետազոտության մեջ, որը հրապարակել է բրիտանական Times Higher Education (THE) հանդեսը:

Հրատարակության կողմից մշակված հաշվարկի համակարգի համաձայն՝ Սան Ֆրանցիսկոյի մերձակայքում գտնվող համալսարանը հավաքել է 3,16 բալ, ինչը վերջնիս դրել է ցուցակի առաջին տեղում: Այդ ցուցանիշը հաշվի է առնում միանգամից մի քանի ասպեկտներ, ներառյալ բուհում աշխատող նոբելյան դափնեկիրների թիվը, եւ այն, թե մրցանակը բանժանվել է արդյոք մի քանի գիտնականների կամ մի քանի ուսումնական հաստատությունների միջեւ: Ըստ որում հաշվի չեն առնվում խաղաղության Նոբելյան մրցանակը եւ գրականության գծով Նոբելյան մրցանակը:

Վարկանիշը ցույց Է տալիս Միացյալ Նահանգների բարձրագույն կրթության գործնականում լիակատար գերակշռությունը. դրա առաջին տասնյակից առաջին ութ հորիզոնականներն զբաղեցրել են հենց ԱՄՆ-ի բուհերը: Ստենֆորդի համալսարանին հաջորդում են Կոլումբիական համալսարանը (2 – 2,5 բալ), Կալիֆոռնիայի Բերկլիի համալսարանը (2 – 2,25 բալ), Փրինստոնի եւ Չիկագոյի համալսարանները բաժանում են չորրորդ հորիզոնականը, Հովարդ Հյուզի բժշկական ինստիտուտը (վեցերորդ տեղ), Կալիֆոռնիայի Սանտա Բարբարայի համալսարանը (յոթերորդ տեղ):

Մասաչուսեթսի տեխնոլոգիական ինստիտուտն զբաղեցնում է ութերորդ հորիզոնականը, որը բաժանում է Տեխնիոնի՝ Իսրայելի տեխնոլոգիական ինստիտուտի հետ: 10-րդ հորիզոնականում է Գերմանիայի Մաքս Պլանկի անվան գիտական հետազոտությունների ընկերությունը:

Այսպիսով, ինչպես նշում է ՏԱՍՍ-ը, առաջին տասնյակ չեն մտել ո՛չ Քեմբրիջի համալսարանը, որն աշխարհին տվել Է ամենից շատ նոբելյան դափնեկիրներ, եթե դիտարկենք 1901 թվականին սահմանված մրցանակի ամբողջ պատմությունը, ո՛չ Հարվարդի համալսարանը, որն աշխարհում չորրորդ տեղն է զբաղեցնում այնտեղ աշխատող հեղինակավոր մրցանակին արժանացածների թվով: