ՀԲ-ն ֆինանսավորում է Վրաստանի տարածաշրջանների, այդ թվում՝ Ջավախքի տուրիստական ենթակառուցվածքը

ՀԲ-ն Վրաստանի համար արտոնյալ ֆինանսական ռեսուրս Է հատկացրել 60 մլն դոլարի չափով: Համապատասխան պայմանագիրն ստորագրել են Վրաստանի ֆինանսների նախարար Նոդար Խադուրին եւ Վրաստանում ՀԲ-ի գրասենյակի ղեկավարի ժամանակավոր պաշտոնակատար Իոսիֆ Մելիտաուրին, տեղեկացնում Է «Արմենպրես»-ը՝ հղում անելով հանրապետության ֆինանսների նախարարությանը:

Նախագծի նպատակը ենթակառուցվածքային ծառայությունների ու ինստիտուցիոնալ հնարավորությունների զարգացումն Է Սամցխե Ջավախքի եւ Մցխեթ Մթիանեթի տարածաշրջանների տնտեսության մեջ զբոսաշրջության ավանդի աճին աջակցելու նպատակով: Երրորդ տարածաշրջանային նախագծի համար հատկացված միջոցները կստացվեն Վերակառուցման եւ զարգացման միջազգային բանկի (IBRD) միջոցով:

Նախագիծը բաղկացած Է երկու մասից. քաղաքների անվանումների վերականգնումն ու տուրիստական երթուղիների մշակումը, հասարակական ու տուրիստական ենթակառուցվածքի ապահովումը մասնավոր ներդրումների ներգրավման համար եւ ինստիտուցիոնալ զարգացումը:

Սա Համաշխարհային բանկի կողմից հաստատված տարածաշրջանային զարգացման երրորդ նախագիծն Է Վրաստանի համար:

Առաջին նախագիծը, որը նախատեսված Է Կախեթի տարածաշրջանի (Արեւելյան Վրաստան) համար, ՀԲ-ի կողմից հաստատվել Է 2012 թվականի մարտին: Վերակառուցման եւ զարգացման միջազգային բանկի միջոցով նախագծի համար հատկացվել Է 60 մլն դոլար: Երկրորդ նախագիծը, որն իրացվել Է Իմերեթի տարածաշրջանում (Արեւմտյան Վրաստան), ՀԲ-ի կողմից հաստատվել Է 2012 թվականի նոյեմբերին, որի համար IBRD-ի միջոցով հատկացվել Է 30 մլն դոլար:

1992 թվականից ի վեր Համաշխարհային բանկի կողմից Վրաստանին հատկացված ընդհանուր գումարը կազմում Է 2,39 միլիարդ դոլար: