Ավտովթար Իսակովի պողոտայում. իրար են բախվել «ԲՄՎ»-ն և «ՎԱԶ 2106»-ը. կան վիրավորներ (ՖՈՏՈ, ՏԵՍԱՆՅՈՒԹ)

Այսօր` նոյեմբերի 8-ին, ավտովթար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 19.30-ի սահմաններում Իսակովի պողոտայում իրար են բախվել «ԲՄՎ» մակնիշի 07 ՏՕ 357 համարանիշի և «ՎԱԶ 2106» մակնիշի 68 ՕՏ 820 համարանիշի ավտոմեքենաները:

Բախման հետևանով նշված փողոցում առաջացել էր հսկայական խցանում, ինչի պատճառով դեպքի վայր էին ժամանել Երևանի ճանապարհային ոստիկանության մեծ թվով աշխատակիցներ` Երևանի ՃՈ պետ Արսեն Մարդոյանի գլխավորությամբ:

Դեպքի վայր էին ժամանել ՀՀ արտակարգ իրավիճակների նախարարության Հայաստանի փրկարար ծառայության Երևանի հատուկ փրկարարական ջոկատի փրկարարները, ովքեր «ՎԱԶ 2106» մակնիշի ավտոմեքենայից դուրս բերեցին վարորդին` 58-ամյա Լևոն Հակոբյանին, և ուղևորուհունd 56-ամյա Գայանե Իսպիրյանին:

Վերջիններս մարմնական վնասվածքներով տեղափոխվեցին «Արմենիա» բժշկական կենտրոն:

«ԲՄՎ» մակնիշի ավտոմեքենան վարել է 21-ամյա Կարապետ Հովհաննիսյանը:

Դեպքի վայր էին ժամանել նաև ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչները` ավագ քննիչ Գագիկ Հարությունյանի գլխավորությամբ:

Վերջինիս հանձնարարականով, ավտոմեքենաները տեղափոխվեցին Երևանի ՃՈ տուգանային հրապարակ:

Լուսանկարները` Գագիկ Շամշյանի