ՀՀ ոստիկանապետ Վլադիմիր Գասպարյանը հանդիպել է ոստիկանության զորքերի անձնակազմի հետ (ՖՈՏՈՌԵՊՈՐՏԱԺ, ՏԵՍԱՆՅՈՒԹ)

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ՀՀ ոստիկանության պետ, ոստիկանության գեներալ-լեյտենանտ Վլադիմիր Գասպարյանն այսօր հանդիպել է ոստիկանության զորքերի սպայական կազմի հետ:

Հիշեցնենք, որ ոստիկանության նորանշանակ պետն անցնող օրերին աշխատանքային հանդիպումներ է ունեցել ոստիկանության կոլեգիայի անդամների, կենտրոնական ապարատի ստորաբաժանումների ղեկավարների և ծառայողների, տարբեր ծառայությունների անձնակազմերի հետ:

Ոստիկանության նորանշանակ պետը կարևորեց բարեփոխումների ընթացքը, շեշտելով, որ արմատական բեկում է պետք արձանագրել՝ հատկապես հասարակության հետ աշխատանքում: Նա ոստիկանության գերխնդիրը համարեց քաղաքացու իրավունքների պաշտպանությունը և օրենքի գերակայության հաստատումը:

Ոստիկանության պետն անձնակազմից պահանջեց ջանադիր ու հետևողական աշխատանք` հույս հայտնելով, որ իրավապահները կկատարեն իրենց առաջադրված խնդիրն`արդարացնելով քաղաքացիների ակնկալիքները:

«Հասարակությունը պետք է վստահի ու սիրի իրավապահին, փոխադարձ վստահությունը շատ կարևոր է»,- ասաց Վլադիմիր Գասպարյանը: Նա կարևորեց նաև մասնագիտական պատրաստության կատարելագործումը: «Պետք է լինել ուժեղ հոգեպես, բարեկիրթ շփման և ճշմարիտ` աշխատանքի մեջ»,- ասաց նա:

Ոստիկանության նորանշանակ պետը կարևորեց նաև բարեփոխումների ընթացքը: Նրա խոսքով՝ առաջիկա ամիսներին դրանք առավել ակնհայտ կլինեն` աշխատանքի մոբիլ կազմակերպման առումով: Ըստ նրա՝ ինքնանպատակ չեն նաև այս օրերին իրականացվող կադրային փոփոխությունները:

Անցնող օրերին Վլադիմիր Գասպարյանը հանդիպել է գրեթե բոլոր ստորաբաժանումների հետ: Գո՞հ է արդյոք արդյունքներից: «Գնահատական ստանում են աշխատանքի շնորհիվ»,- ասում է նա:

«Հանրապետության նախագահն ինձ նշանակել է այս պաշտոնին` իմանալով իմ աշխատանքը»,- ասում է նա` վստահեցնելով, որ գերակա է լինելու անձնական պատասխանատվությունը:

Խորհրդակցության ավարտին Վլադիմիր Գասպարյանը հետևեց նաև հասարակական կարգի պաշտպանությանը միտված ոստիկանության զորքերի ուսումնավարժական պարապմունքներին, ինչպես նաև ծանոթացավ ոստիկանության զորքերի տրամադրության տակ եղած հատուկ միջոցներին:

Ֆոտոռեպորտաժը և տեսանյութը` Գագիկ Շամշյանի