Մինսկի խմբի համանախագահներին անհանգստացնում է ծանր տեխնիկայի կիրառումը հայ-ադրբեջանական սահմանին

ԵԱՀԿ Մինսկի խմբի համանախագահներին խորապես մտահոգում է վերջին շրջանում մեծ տարամաչափի զինատեսակների և ծանր տեխնիկայի կիրառումը հայ-ադրբեջանական սահմանին և շփման գծում: «Արմենպրես»-ի փոխանցմամբ' այս մասին Երևանում հայտարարեց ԵԱՀԿ Մինսկի խմբի ԱՄՆ համանախագահ Ջեյմս Ուորլիքը: Նրա խոսքով' եթե երկու տարի առաջ Երևան կատարած իր առաջին այցի ժամանակ առանցքային խնդիրներից էր հակամարտող կողմերի միջև ընթացող դիպուկահարների փոխհրաձգությունը, ապա այսօր կողմերը կիրառում են ծանր տեխնիկա, ինչը կարող է հանգեցնել կործանարար հետևանքների: «Ամենևին չնվազեցնելով դիպուկահարներից եկող վտանգը, քանի որ բազմաթիվ մարդկանց կյանքեր են խլվել դիպուկահարների կրակոցների հետևանքով, պետք է նշեմ, որ ներկայումս տիրող իրավիճակը շատ ավելի վտանգավոր է: Մենք պետք է վերջ տանք այս ամենին: Անկերղծորեն ասած՝ ես կցանկանայի կողմերից ավելի մեծ հանձնառություն տեսնել՝ չկիրառելու այս զինատեսակները»,- նկատեց դիվանագետը:

Լրագրողի այն հարցին, թե Ադրբեջանն արդյոք չի՞ մերժել հետաքննությունների անցկացման առաջարկը, Ուորլիքը նշեց, որ այն դեռ չի ընդունվել Ադրբեջանի կողմից: «Նրանք դեռ չեն ընդունել հետաքննությունների անցկացման մեխանիզմի ստեղծման առաջարկը, և մենք պետք է շարունակենք բանակցությունները՝ պարզելու, թե ինչպիսին պետք է լինեն այդ մեխանիզմները»,- ասաց համանախագահը: Ուորլիքը հավաստիացրեց, որ միջնորդները պատրաստակամ են քննարկել խաղաղ և երկարատև կարգավորման հասնելու բոլոր ուղիները և խողովակները:

Լեռնային Ղարաբաղի հակամարտության կարգավորման խնդրով զբաղվող ԵԱՀԿ Մինսկի խմբի ամերիկացի համանախագահ Ջեյմս Ուորլիքը Երևան է ժամանել հոկտեմբերի 26-ին' առավոտյան 4:30-ին: ՄԽ մյուս համանախագահներ Իգոր Պոպովի (Ռուսաստան) և Պիեր Անդրիուի (Ֆրանսիա) հետ նա հանդիպումներ կունենա ՀՀ նախագահ Սերժ Սարգսյանի և արտգործնախարար Էդվարդ Նալբանդյանի հետ: ԵԱՀԿ գործող նախագահի անձնական ներկայացուցիչ դեսպան Անջեյ Կասպրշիկի ուղեկցությամբ տարածաշրջանային այցի շրջանակում նրանք այցելելու են Լեռնային Ղարաբաղի Հանրապետություն' հանդիպելու երկրի ղեկավարության հետ:

Հայտնի է նաև, որ համանախագահները Բաքվում կլինեն հոկտեմբերի 28-ին: