Տարածաշրջանում նախորդ շաբաթ գրանցվել է 3 բալ և ավելի ուժգնությամբ 5 երկրաշարժ

Սեյսմիկ պաշտպանության ծառայության դիտացանցը նոյեմբերի 19-25-ն ընկած ժամանակահատվածում տարածաշրջանում գրանցվել է 3 բալ և ավելի ուժգնությամբ 5 երկրաշարժ: Ինչպես տեղեկացնում են ՍՊԾ գործակալությունից, նոյեմբերի 21-ին 3 բալ ուժգնությամբ (մագնիտուդ 2 .3 և 2.6) երկու երկրաշարժ է տեղի ունեցել Թուրքիայում՝ Վան քաղաքից 35 կմ դեպի հյուսիս-արևելք և 26 կմ դեպի հյուսիս-արևմուտք: Նույն օրը 3-4 բալ ուժգնությամբ (մագնիտուդ 2.7) երկրաշարժ է գրանցվել Ադրբեջանում՝ Մինգեչաուր քաղաքից 17 կմ դեպի հյուսիս-արևմուտք: Նոյեմբերի 22-ին տեղի ունեցած 3 բալ (մագնիտուդ 2.5) ուժգնությամբ ստորգետնյա ցնցման էպիկենտրոնը գտնվում էր Թուրքիայի Բուլանիկ քաղաքից 5 կմ դեպի հարավ-արևելք: Նոյեմբերի 23-ին Իրան-Թուրքիա սահմանային գոտում՝ Սալմաստ քաղաքից 47 կմ դեպի հյուսիս-արևմուտք գրանցված երկրաշարժի ուժգնությունը եղել է 3 բալ (մագնիտուդ 2.6):

Տարածաշրջանից դուրս նույն ժամանակահատվածում գրանցվել է 6 և ավելի մագնիտուդով 4 երկրաշարժ: Նոյեմբերի 21-ին 6.1 մագնիտուդով երկրաշարժ է տեղի ունեցել Ինդոնեզիայում՝ Սամուլակի քաղաքից 174 կմ դեպի հյուսիս-արևմուտք: Նոյեմբերի 24-ին 6 մագնիտուդով երկրաշարժ է գրանցվել Խաղաղ օվկիանոս ավազանում՝ Հյուսիսային Մարիանյան կղզիների տարածքում: Նոյեմբերի 25-ին գրանցված 7.6 մագնիտուդով և 600 կմ խորությամբ երկրաշարժի էպիկենտրոնը գտնվում էր Պերույում' Իբերիա քաղաքից 169 կմ դեպի հյուսիս-արևմուտք, վերջինիս րոպեներ անց հետևել է 7.6 մագնիտուդով երկրորդ երկրաշարժը' 610 կմ խորությամբ: Երկրաշարժերի հետևանքով զոհեր և ավերածություններ չկան:

Նոյեմբերի 24-ին 5.5 մագնիտուդով երկրաշարժ է տեղի ունեցել Մեքսիկայում՝ Սան Լուիս Ակատլան գյուղից 29 կմ դեպի հյուսիս-արևմուտք: Ստորգետնյա ցնցումները սողանքի պատճառ են դարձել, որի հետևանքով զոհվել է երկու մարդ: