Հայաստանի և Շվեդիայի արտգործնախարարները քննարկել են երկկողմ հարաբերություններին առնչվող մի շարք հարցեր

Աշխատանքային այցով Բրյուսելում գտնվող Հայաստանի արտգործնախարար Էդվարդ Նալբանդյանը դեկտեմբերի 1-ին հանդիպել է Շվեդիայի արտաքին գործերի նախարար Մարգոտ Վալստրյոմի հետ։

Հանդիպմանը նախարար Նալբանդյանը նշել է, որ Հայաստանը մեծ կարևորություն է տալիս Շվեդիայի հետ համագործակցության զարգացմանը' քաղաքական, տնտեսական և հումանիտար բնագավառներում՝ փաստելով, որ վերջին տարիներին զգալիորեն ակտիվացել են հայ-շվեդական հարաբերությունները, ինչն արտացոլվել է փոխայցելությունների և քաղաքական երկխոսության ինտենսիվությամբ։

Զրույցի ընթացքում քննարկվել են բարձրաստիճան փոխայցելությունների կազմակերպման, միջազգային կազմակերպություններում փոխգործակցության սերտացման, իրավապայմանագրային դաշտի ընդլայնման հարցեր։

Նախարարներ Նալբանդյանն ու Վալստրյոմը մտքեր են փոխանակել Հայաստան - Եվրոպական միություն համագործակցության վերաբերյալ։

Հայաստանի և Շվեդիայի արտգործնախարարներն անդրադարձել են հրատապ միջազգային խնդիրներին և դրանց հանգուցալուծման ուղղությամբ գործադրվող ջանքերին։

Էդվարդ Նալբանդյանը Մարգոտ Վալստրյոմին ներկայացրել է ղարաբաղյան հիմնախնդրի կարգավորման ուղղությամբ Հայաստանի և ԵԱՀԿ Մինսկի խմբի համանախագահների կողմից գործադրվող ջանքերը։