Գերմանիան Հայաստանի գլխավոր տնտեսական գործընկերներից է. Նալբանդյան

Գերմանիան Հայաստանի գլխավոր տնտեսական գործընկերներից է։ Այդ մասին ասել է արտգործնախարար Էդվարդ Նալբանդյանը, որը դեկտեմբերի 9-ին Գերմանիայի ԱԳ նախարար Ֆրանկ-Վալտեր Շտայնմայերի հրավերով այցելել է Բեռլին։

Նույն օրը կայացավ Հայաստանի եւ Գերմանիայի արտաքին գործերի նախարարների հանդիպումը։

Հայաստանի եւ Գերմանիայի արտաքին քաղաքական գերատեսչությունների ղեկավարները գոհունակություն հայտնեցին երկու երկրների միջեւ հաստատված բարձր մակարդակի ակտիվ քաղաքական երկխոսության կապակցությամբ եւ ընդգծեցին, որ երկու երկրներն էլ շահագրգռված են երկկողմ համագործակցության առավել զարգացմամբ։

Շնորհակալություն հայտնելով Բեռլին այցելելու հրավերի համար՝ նախարար Նալբանդյանը նշեց, որ վերջին շրջանում տարբեր բնագավառներում հայ-գերմանական համագործակցությունը նոր թափ է ստացել։ Նախարարը վստահություն հայտնեց, որ համատեղ հետեւողական ջանքերով երկու երկրների միջեւ հարաբերությունները հնարավոր է առավել խորացնել եւ ընդլայնել։ Հայաստանի արտգործնախարարը շեշտեց, որ Գերմանիան Հայաստանի գլխավոր տնտեսական գործընկերներից է, եւ շնորհակալություն հայտնեց Հայաստանի զարգացմանն ուղղված ծրագրերին ԳԴՀ շարունակական աջակցության համար:

Գոհունակությամբ ընդգծվեց, որ առկա է շուրջ չորս տասնյակ պայմանագիր եւ համաձայնագիր ներառող ամուր իրավապայմանագրային դաշտ, զարգանում է փոխգործակցությունը միջազգային կազմակերպություններում, բարձր մակարդակի վրա են գտնվում միջխորհրդարանական շփումները, ակտիվանում է գիտակրթական եւ մշակութային համագործակցությունը, ընդլայնվում են գործարար կապերը. Հայաստանում գործում են գերմանական կապիտալով շուրջ 100 ընկերություն:

Զրուցակիցները նշեցին, որ Հայաստանն ու Գերմանիան արդյունավետ համագործակցում են խաղաղապահ գործողությունների շրջանակներում, մասնավորապես՝ Աֆղանստանում։

Հայաստանի եւ Գերմանիայի արտգործնախարարներն անդրադարձան միջազգային եւ տարածաշրջանային մի շարք խնդիրների՝ Իրանի միջուկային ծրագրի շուրջ համաձայնությունների իրականացմանը, Ուկրաինայում տեղի ունեցող զարգացումներին, Միջին Արեւելքում իրավիճակին, սիրիական ճգնաժամին, ահաբեկչության դեմ պայքարի ուղղությամբ միջազգային հանրության ջանքերին:

Նախարարները քննարկեցին Հայաստան – Եվրոպական միություն հարաբերությունները: Կարեւորվեցին նախօրեին մեկնարկած Հայաստան - ԵՄ նոր իրավական շրջանակային փաստաթղթի շուրջ բանակցությունները։

Գալիք տարի ԵԱՀԿ-ում Գերմանիայի նախագահության համատեքստում Հայաստանի եւ Գերմանիայի արտաքին քաղաքական գերատեսչությունների ղեկավարները մտքեր փոխանակեցին կազմակերպության օրակարգային հարցերի, Բելգրադի նախարարական խորհրդի արդյունքների, գերմանական նախագահության առաջնահերթությունների վերաբերյալ։

Նախարար Նալբանդյանը գերմանացի գործընկերոջը ներկայացրեց ղարաբաղյան հիմնախնդրի խաղաղ կարգավորման ուղղությամբ Հայաստանի եւ ԵԱՀԿ Մինսկի խմբի համանախագահների կողմից ձեռնարկվող ջանքերը:

Հայաստանի ԱԳ նախարարը հրավիրեց Գերմանիայի արտգործնախարարին այցելել Հայաստան։

Նույն օրը Էդվարդ Նալբանդյանը հանդիպում ունեցավ կանցլեր Անգելա Մերկելի արտաքին քաղաքականության եւ անվտանգության հարցերով գլխավոր խորհրդական Քրիստոֆ Հոյսգենի հետ: Զրուցակիցները հանգամանալից քննարկեցին Հայաստան – Եվրոպական միություն համագործակցությունը։ Հանդիպմանը մտքեր փոխանակվեցին նաեւ մի շարք հրատապ տարածաշրջանային հարցերի շուրջ։

Դեկտեմբերի 9-ին Էդվարդ Նալբանդյանը հանդիպում ունեցավ Գերմանիա - Հայաստան ֆորումի ներկայացուցիչների հետ՝ Բունդեսթագի պատգամավոր, ֆորումի նախագահ Ալբերտ Վայլերի գլխավորությամբ։

Հանդիպմանը Ալբերտ Վայլերը Էդվարդ Նալբանդյանին ներկայացրեց ֆորումի կողմից կատարվող աշխատանքները եւ կառույցի ծրագրերը։

Հայաստանի արտգործնախարարը բարձր գնահատեց ֆորումի գործունեությունն՝ ուղղված հայ-գերմանական բարեկամական հարաբերությունների առավել ամրապնդմանն ու ընդլայնմանը։

Մտքերի փոխանակում ծավալվեց հայ-գերմանական հարաբերությունների, Հայաստան - ԵՄ համագործակցության, արդի միջազգային եւ տարածաշրջանային խնդիրների, ղարաբաղյան հիմնախնդրի խաղաղ կարգավորման ուղղությամբ գործադրվող ջանքերի շուրջ։