Էլեկտրական ենթակայանում այրված դիակի ինքնությունը պարզվել է (ՖՈՏՈ, ՏԵՍԱՆՅՈՒԹ)

Ինչպես ավելի վաղ ԼՈՒՐԵՐ.com-ին այս մասին տեղեկացրել էր ֆոտոլրագրող Գագիկ Շամշյանը, հոկտեմբերի 13-ին Արարատի մարզի Ոսկետափ գյուղի գերեզմանատանը հարակից նախկին էլեկտրական ենթակայանի շենքում հայտնաբերվել էր 20-35 տարեկան, միջին կազմվածքի, 150-160 սմ հասակ ունեցող, անձը չպարզված կնոջ կիսաայրված դիակ: Հագուստներն այրված էին, պահպանվել էր մազերի մետաղյա հերակալը (նկարում):

Ինչպես հայտնում է ֆոտոլրագրող Գագիկ Շամշյանը, ոստիկանության ծառայողների ձեռնարկած միջոցառումների շնորհիվ և համաձայն նոյեմբերի 9-ին ստացված գենետիկական փորձաքննության եզրակացության՝ հայտնաբերվածը Երևան քաղաքում հաշվառված, 23-ամյա Ալվինա Հովհաննիսյանն է, որը հոկտեմբերի 13-ից, որպես անհայտ կորած, հետախուզվում էր ոստիկանության Նոր Նորքի բաժնի կողմից:

ՀՀ քրեական օրենսգրքի 104 հոդվածի (սպանություն) 1-ին մասի հատկանիշներով հարուցված քրեական գործով նախաքննությունը շարունակվում է:

Հիշեցնենք, որ հոկտեմբերի 13-ին, արտակարգ դեպք էր տեղի ունեցել Արարատի մարզում:

Ինչպես Արարատի մարզից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 16.00-ի սահմաններում ոստիկանության Արարատի մարզային վարչություն ահազանգ է ստացվել Արարատի մարզի Ոսկետափ գյուղի բնակչից:

Բնակիչը հայտնել է, որ իրենց գյուղին հարակից գերեզմանատան հարևանությամբ չգործող էլեկտրաենթակայանի ներսում այրված դիակ կա:

Շտապ դեպքի վայր է մեկնել ոստիկանության Արարատի մարզային վարչության օպերատիվ խումբը` մարզային վարչության պետ Արսեն Աբրահամյանի, օպերգծով տեղակալ Եգոր Անտոնյանի և ոստիկանության Արարատի բաժնի պետ Սևան Քոչարյանի գլխավորությամբ:

Օպերատիվ խմբի հրահանգով դեպքի վայր էր արդեն ժամանել ոստիկանության քննչական գլխավոր վարչության Արարատի մարզի քննչական բաժնի քննիչը:

Դեպքի վայրում էր եղել նաև դատական բժիշկը և փորձագետը:

Օպերատիվ-քննչական խումբը նշված ենթակայանի ներսում հայտնաբերել է երիտասարդ աղջկա դիակ` այրված, ածխացած վիճակում:

Քննիչի որոշմամբ նշանակվել են մի շարք փորձաքննություններ, այդ թվում նաև` դիակի:

Փաստի առթիվ ոստիկանության քննչական գլխավոր վարչության Արարատի մարզի քննչական բաժնում հարուցվել է քրեական գործ: Կատարվում է նախաքննություն:

Այս պահին ոստիկանության Արարատի մարզային վարչությունում ստեղծվել են երեք-չորս օպերատիվ խմբեր` օպերատիվ-քննչական գործողություններն առավել համապարփակ իրականացնելու համար: Այս պահին նրանց թիվ 1 խնդիրն է պարզել դիակի ինքնությունը:

Լուսանկարները և տեսանյութը` Գագիկ Շամշյանի