Սերբիան ԼՂ հակամարտության կարգավորման միակ ընդունելի ձևաչափ է համարում Մինսկի խմբին

Հայաստանի Հանրապետության Ազգային ժողովի նախագահ Գալուստ Սահակյանը փետրվարի 8-ին ընդունել է պաշտոնական այցով Հայաստան ժամանած Սերբիայի Հանրապետության Ազգային ժողովի նախագահ Մայա Գոյկովիչի գլխավորած պատվիրակությանը:

Գալուստ Սահակյանը, ողջունելով հյուրերին Հայաստանի խորհրդարանում, նշել է, որ թեև հայ-սերբական հարաբերություններն ունեն բազմամյա պատմություն՝ հիմնված փոխադարձ բարյացակամության և աջակցության վրա, սակայն Հայաստանի համար անակնկալ էր ԵԽԽՎ-ի վերջին նստաշրջանում հակահայկական երկու բանաձևերին սերբական պատվիրակության գրեթե բոլոր անդամների աջակցելու փաստը, ինչը, ՀՀ ԱԺ նախագահի խոսքով, հակասում է մեր երկրների միջև բազմամյա բարեկամական հարաբերությունների ոգուն, ինչպես նաև Սերբիայի պաշտոնական դիրքորոշմանը Ղարաբաղյան հիմնախնդրի վերաբերյալ: Գալուստ Սահակյանն անհրաժեշտություն է համարել երկու երկրների խորհրդարանների միջև ակտիվ երկխոսության ձևավորումը և նշել, որ այդպիսով, գուցե, հնարավոր կլինի շտկել Սերբիայի պատվիրակության քվեարկության հետևանքով ստեղծված իրավիճակը: Այս մասին տեղեկացնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:

Անդրադառնալով տարածաշրջանային հարցերին՝ Ազգային ժողովի նախագահը նշել է, որ Հայաստանի արտաքին քաղաքականության առաջնահերթություններից է Լեռնային Ղարաբաղի հիմնախնդիրը, որի հանգուցալուծումը Հայաստանը տեսնում է միջազգային հանրության կողմից ընդունված միակ ձևաչափի՝ ԵԱՀԿ Մինսկի խմբի եռանախագահության շրջանակում: «Չնայած նրան, որ Ադրբեջանն ամեն կերպ փորձում է խոչընդոտել հիմնախնդրի խաղաղ կարգավորմանը՝ մենք շարունակելու ենք հավատարիմ մնալ հակամարտությունը բանակցային ճանապարհով լուծելու մեր դիրքորոշմանը՝ չտրվելով հակառակ կողմի սադրանքներին»,- ընդգծել է պարոն Սահակյանը:

Խորհրդարանի ղեկավարը, անդրադառնալով Հայաստանի և Սերբիայի միջև տնտեսական սերտ կապերի ձևավորմանը, նշել է. «Պետք է երկուստեք օգտագործել առկա ներուժը շոշափելի արդյունքների հասնելու համար՝ ի նպաստ երկու ժողովուրդների բարօրության»:

Գալուստ Սահակյանը նշել է, որ Հայաստանի արտաքին քաղաքականության կարևորագույն հարցերից է նաև Հայոց ցեղասպանության ճանաչումը՝ ընդգծելով, որ Հայաստանի Հանրապետությունն ամեն ջանք գործադրելու է միջազգային հանրության կողմից Հայոց ցեղասպանության լիարժեք ճանաչմանը հասնելու համար:

Սերբիայի Հանրապետության Ազգային ժողովի նախագահ Մայա Գոյկովիչը, շնորհակալություն հայտնելով ընդունելության համար, արժևորել է երկու երկրների բարեկամական հարաբերությունները, մասնավորապես միջխորհրդարանական համագործակցության խորացումն ու երկկողմ կապերի ակտիվացումը: Մայա Գոյկովիչը, կարևորելով փոխգործակցությունը միջազգային կառույցներում, առաջարկել է երկու խորհրդարանների համագործակցությունն ակտիվացնել: Անդրադառնալով Լեռնային Ղարաբաղի հակամարտությանը՝ նա նշել է, որ Արցախի հիմնախնդիրը պետք է կարգավորվի ԵԱՀԿ Մինսկի խմբի շրջանակն երում, մադրիդյան սկզբունքների հիման վրա:

Նա երախտիքի խոսք է հայտնել Հայաստանին՝ Կոսովոյի հարցում Սերբիայի ինքնիշխանությունը և տարածքային ամբողջականությունը պաշտպանելու համար:

ՀՀ Ազգային ժողովի նախագահ Գալուստ Սահակյանը և Սերբիայի Հանրապետության Ազգային ժողովի նախագահ Մայա Գոյկովիչը խորհրդարանում ունեցած հանդիպումից հետո հանդես են եկել համատեղ հայտարարությամբ՝ ամփոփելով հանդիպման արդյունքները: Այնուհետև խորհրդարանի այգում' «Հիշողության պուրակում», տնկել են եղևնի: