Անկարայի ահաբեկչության զոհերի թիվը հասել է 34-ի

Թուրքիայի մայրաքաղաք Անկարայում փետրվարի 13-ին իրականացված ահաբեկչության հետևանքով զոհերի թիվը հասել է 34-ի: Ինչպես հաղորդում է «Արմենպրես»-ը՝ վկայակոչելով թուրքական «Հուրիեթ» պարբերականը, այս մասին հայտնել է Թուրքիայի առողջապահության նախարար Մեհմեթ Մուեզզինօղլուն:

«Դեպքի վայրում մահացածների թիվը 30-ն է: 4-ը մահացել են հիվանդանոցներում: Դեպքի վայրում մահացածներից առնվազն մեկը, իսկ ամենայն հավանականությամբ երկուսն ահաբեկիչներ են: Այս պահին հիվանդանոցներում բուժում է ստանում 125 մարդ, որոնցից 19-ի վիճակը ծանր է»,- ասել է նախարարը:

Թուրքիայի ներքին գործերի նախարար Էֆքան Ալան հայտնել է, որ տեղեկությունը պայթուցիկով ավտոբուսի մասին հաստատվել է: Նախարարի համոզմամբ՝ արդեն իսկ կան այլ մանրամասներ ահաբեկչության հետ կապված, սակայն դրանք կհայտարարվեն ավելի ուշ:

Անկարայում հերթական ահաբեկչությունը տեղի է ունեցեկ մարտի 13-ին քաղաքի կենտրոնական հատվածում' ավտոբուսի կանգառներից մեկում, որը գտնվում է Թուրքիայի վարչապետի աշխատավայրի մոտ' Գյուվեն այգու մոտակայքում: Պայթյունի ժամանակ նշված տեղանքում մեծ թվով մարդիկ են եղել: Ամբողջությամբ այրվել է մեկ ավտոբուս:

Ոստիկանության նախնական վարկածով՝ պատահարը տեղի է ունեցել ականապատված մեքենայի պայթյունի հետևանքով, որը կայանված է եղել երկու ավտոբուսների միջև: