Ադրբեջանի ևս մեկ բնակիչ պատրաստակամություն է հայտնել ընտանիքով անցնել ԼՂՀ

Ադրբեջանում իշխանությունների կամայականությունից հոգնած երթուղային տաքսու վարորդ Ջեյհուն Ալիեւը հայտարարել է ընտանիքով Լեռնային Ղարաբաղի Հանրապետություն անցնելու պատրաստակամության մասին:

Ինչպես հաղորդում է «Արմենպրես»-ը' վկայակոչելով Meydan TV հեռուստաալիքի կայքը, Ջեյհուն Ալիեւը 7 տարուց ավելի է' վարորդ է աշխատում Մինգեչաուրի ավտոկայանում դեպի Զաքթալա եւ Կախ երթուղում: Նա կանոնավոր կերպով վճարել է բոլոր պետական տուրքերն ու կատարել սոցիալական պաշտպանության հիմնադրամին մուծումները: Նրա խոսքով' մի քանի տարի առաջ իրեն ստիպել են Զաքաթալա-Կախ ուղղությամբ աշխատելու թույլտվություն ստանալ, սակայն, ունենալով այդ արտոնագիրը, այժմ նրան թույլ չեն տալիս աշխ ատել այդ գծում:

Կայքի հետ զրույցում Ջեյհուն Ալիեւը պատմել է, որ իրեն զրկել են Զաքաթալա-Կախ երթուղուց, քանի որ այն այժմ պատկանում է Զաքաթալայի գործադիր իշխանության ղեկավար Մուբարիզ Ահմեդզադեին:

Նա նաեւ նշել է, որ ունի երեք երեխա, մայրը երկրորդ կարգի հաշմանդամ է, եւ ամաչում է տուն գնալ:

«Զաքաթալայի գործադիր ղեկավար Մուբարիզ Ահմեդզադեն աչք է դրել իմ նման աղքատի եւ որբի երթուղուն: Ի՞նչ անեմ: Սպանե՞մ ինձ: Գլուխս առնեմ, ո՞ր երկիր փախչեմ: Ավագ որդիս շուտով պետք է բանակ գնա: Ի՞նչ սրտով նա պետք է ծառայի Ադրբեջանին: Ես հոգնել եմ իմ կյանքից: Ես անելանելի վիճակում եմ: Կվերցնեմ ընտանիքս եւ կգնամ Աղդամ: Այնտեղից կանցնեմ հայերի կողմը, որպեսզի ապրենք այնտեղ: Մեր ժողովուրդը որբերին եւ աղքատներին չի օգնում», -ասել է նա:

Ադրբեջանական ԶԼՄ-ներն ավելի վաղ հայտնել էին խաղաղ բնակիչների մասին, որոնք անցել կամ փորձել էին անցնել ադրբեջանա-հայկական սահմանը եւ հանձնվել Հայաստանին կամ ԼՂՀ-ին:

Այսպես, Ադրբեջանի Գաբալայի շրջանի Քյոթուքլու գյուղի 25 բնակիչներ լույս փետրվարի 27-ի գիշերը փորձել են Ակնի (Աղդամի) կողմից անցնել Լեռնային Ղարաբաղի Հանրապետություն:

ԼՂՀ անցնել ցանկացած գաբալացիներից Ռամին Իսմայիլովը Meydan TV-ին հայտնել է, որ գիշերով սպիտակ դրոշներով դեպի ԼՂՀ սահման գնալու ժամանակ իրենց շրջապատել են ոստիկանության աշխատակիցները եւ տարել բաժանմունք:

Նա ասել է, որ իրենք ցանկացել են անցնել ԼՂՀ' Գաբալայում Նաբիեւների ընտանիքի կողմից արված անօրինականությունների պատճառով:

«Նաբիեւները մեր երեխաներին շառով են տալիս եւ ձերբակալում: «Ազերիգազ»-ի Բաքվի գծով ներկայացուցիչ Գարա Նաբիեւը, հարկերի նախարարի խորհրդական Մուսավեր Նաբիեւը, Քյոթուքլու գյուղի գործադիր իշխանության ներկայացուցիչ Իքրամ Նաբիեւը գնել են Գաբալան: Նրանք մեզ չեն թողնում ապրենք: Ցանկացած մարդու տուն եւ ավտոմեքենա թմրանյութ են նետում եւ ձերբակալել տալիս: Մենք այլեւս չենք կարող ապրել Գաբալայում, եւ ընդհանրապես' Ադրբեջանում: Այդ պատճաով էլ ցանկանում ենք անցնել Ղարաբաղ: Թեկուզ մեզ հայերը գնդակահարեն, ուզում ենք ազատվել Նաբիեւների զուլումից», -ասել էր Ռամին Իսմայիլովը:

«Ազադլըգ» թերթը հայտնել էր, որ Գաբալայից պատրաստվում են Իրան փախչել եւս 108 բնակիչներ: Նրանք հայտարարել են, որ ցանկանում են Ադրբեջանի քաղաքացիությունից հրաժարվել շրջանի դատարանի անարդարութունների պատճառով:

Շրջանի բնակիչ Աքիֆ Իսմայիովը թերթին հայտնել է, որ դատարանը անարդարացի վճիռ' մեկ տարվա ազատազրկման է ենթարկել իր որդուն այն բանի համար, որ նա ընդամենը վկա է եղել երկու երիտասարդների միջեւ թեթեւ ծեծկռտուքին: Նա պատմել է, որ բողոքվ եղել է Ադրբեջանի ներքին գործերի նախարարի մոտ, որն ասել է, որ երիտասարդներին կարելի էր ընդամենը 15 օր պատժել մեկուսացմամբ: Սակայն, դատարանը չի փոխել վճիռը: Նա հավելել է, որ իր եւ մյուս դատապարտվածների մերձավորները' թվով 108 հոգի ցանակնում են հրաժարվել Ադրբեջանի քաղաքացիությունից: «Այլ ճանապարհ չունենք: Մենք չենք կարողանում դիմանալ նման անարդարությանը: Ձեռքներիս սպիտակ դրոշով կանցնենք Իրան», -ասել էր Աքիֆ Իսմայիլովը:

Ադրբեջանական ԶԼՄ-ները նաեւ հայտնել էին, որ 2014 թվականի հունվարի 23-ին Բեյլագանի շրջանի տասնյակ բնակիչներ ի բողոք իրենց տների քանդման փորձել են անցնել ԼՂՀ-ի տարածք: 2014 թվականի հունվարի 29-ին Վրաստանի հետ Հայաստանի սահմանում հայ սահմանապահներին դիմել է Բաքվի բնակիչ Ջավիդ Օրուջեւը (ծնվ. 1976 թ.): Նա քաղաքական ապաստան է խնդրել իր, կնոջ եւ երեք երեխաների համար: 2014 թվականի ապրիլի 12-ին Նախիջեւանի ինքնավար հանրապետության բնակիչ Նազիմ Մամեդովը սպիտակ դրոշով Հայաստան անցնելու ժամանակ ադրբեջանական զինվորականների կողմից ձերբակալվել եւ հանձնվել էր իրավապահներին: Գյոյչայի շրջանի բնակիչ Նազիմ Աղաեւը եւս 2010 թվականին հայտարարել էր Հայաստանում ապաստան խնդրելու մասին, քանի որ քննիչը դստեր մարմինը հանձնելու դիմաց իրենից 1000 դոլար կաշառք էր վերցրել:

Միջադեպերի հետ կապված սուր քննարկումներ են սկսվել սոցցանցերում: Մի օգտատեր գրում է. «Արեւմուտքի առաջ ցանկացած գնով իրեն «հանդուրժողական», «մուլտիկուլտուրալ» ներկայացնող իշխանությունների երեսպաշտությունը սահման չունի: Իսկ Արեւմուտքը սեփական շահերի համար լռում է, բայց եւ հասկացնել տալիս, որ գիտի, թե ինչպիսի աղետալի վիճակում է ադրբեջանական ժողովուրդը: «Իշխանությունները բարձր ամբիոնից հայտարարում են, թե «Արեւմուտքը մեզ չի սիրում, որովհետեւ մենք մուսուլման ենք»: Իսկ իրենք ժողովրդի հսկայական ֆինանսական միջոցները ծախսում են արեւմտյան նախագծերի, Լուվրի, Վատիկանի, Բուլղարիայի անձավների վերանորոգման, Եվրատեսիլ, Եվրախաղեր, այժմ էլ' «Ֆորմուլա-1» անցկացնելու վրա: Նրանք համոզված են, որ ոստիկանական մահակներով կճնշեն ժողովրդին: Այժմ հասանք նրան, որ իշխանություններից զզված մարդիկ զանգվածաբար պատրաստվում են անցնել նույն իշխանությունների կողմից թշնամի հայտարարված հայերի կողմը: Համոզված եմ, որ հիմա իշխանությունները կպատժեն ոչ թե իսկական մեղավորներին,այլ հենց այդ մարդկանց, որոնք վտանգելով կյանքը փախչում են երկրից», -գրել է մի օգտատեր: