Թուրք իրավապահները բացահայտել են երկրորդ մահապարտ ահաբեկչի ինքնությունը

Թուրքական իրավապահ մարմինները հստակեցրել են Անկարայում ահաբեկչություն իրականացրած մահապարտներից երկրորդի ինքնությունը: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

Թուրքական իրավապահների տեղեկություններով՝ մահապարտը 26-ամյա Օզգյուր Ունսալն է, ով երկար ժամանակ է՝ ապրում է Անկարայում: Դեռևս հայտնի չէ' արդյոք նա հարել է որևէ կազմակերպության:

Թուրքիայի ներքին գործերի նախարարությունն ավելի վաղ բացահայտել էր ահաբեկիչներից ևս մեկի՝ կնոջ ինքնությունը. խոսքը 1992 թվականին ծնված, Կարսի գրանցում ունեցող Սեհեր Չաղլա Դեմիրի մասին է: ՆԳՆ տվյալներով՝ Սեհերը 2013 թվականից անդամակցում է Քրդական բանվորական կուսակցությանը (PKK): Ավելի ուշ նա անցել է Սիրիա և պատրաստվել «Ժողովրդավարական միություն» կուսակցության (PYD) կազմում:

Անկարայի վերջին ահաբեկչությունը տեղի է ունեցել մարտի 13-ի երեկոյան: Դրա հետևանքով զոհվել է 37 մարդ, ավելի քան հարյուրը վիրավոր են, ընդ որում 15-ի վիճակը ծանր է: