Ավտովթար` Երևանում. «ՎԱԶ 2107»-ը շուռ է եկել (ֆոտո, տեսանյութ)

Այսօր` նոյեմբերի 11-ին, ավտովթար է տեղի ունեցել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 13.00-ի սահմաններում 21-ամյա Սաչեյանը, վարելով «ՎԱԶ 2106» մակնիշի 26 ՕԼ 944 համարանիշի ավտոմեքենան, Նուբարաշենի խճուղում' Նուբարաշենի հայտնի ավտոշուկայի հարևանությամբ, դուրս է եկել ճանապարհի բանուկ մասից և հարվածել ճամփին կայանված «ՎԱԶ 2107» մակնիշի Տ 5924 համարանիշի ավտոմեքենային:

Բախման հետևանքով «ՎԱԶ 2107»-ը կողաշրջվել է:

Բարեբախտաբար, այդ պահին վարորդը' 52-ամյա Արտավազդ Խաչատրյանը, «ՎԱԶ 2107»-ի մեջ չի եղել:

Վթարի հետևանքով զոհեր և վիրավորներ չկան:

Դեպքի վայր էին ժամանել Երևանի Ճանապարհային ոստիկանության 1-ին սպայական գումարտակի տեսուչները:

Դեպքի վայր էին ժամանել նաև ապահովագրական ընկերության ներկայացուցիչները:

Ականատեսները պատմել են, որ նշված հատվածում ուրբաթ օրվանից սկսվում է ավտոմեքենաների կուտակումը, քանի որ շաբաթ-կիրակի օրերին ավտոշուկայում լինելու համար մարդիկ իրենց ավտոմեքենաները ուրբաթ օրն են շուկա բերում:

Լուսանկարները և տեսանյութը' Գագիկ Շամշյանի