Սպանություն Արագած գյուղում. 33-ամյա տղամարդը քարով սպանել է իր համագյուղացուն (ՖՈՏՈ, ՏԵՍԱՆՅՈՒԹ)

Նոյեմբերի 8-ին սպանություն էր տեղի ունեցել Արագածոտնի մարզում: Ինչպես Արագածոտնի մարզից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նոյեմբերի 8-ին` ժամը 20.30-ի սահմաններում, Արագածոտնի մարզի Արագած գյուղում տեղի էր ունեցել սպանություն. այդ մասին ոստիկանությունն ահազանգ էր ստացել անհայտ քաղաքացուց:

Սպանության վայր էին ժամանել ոստիկանության Արագածոտնի մարզային վարչության օպերատիվ խումբը` Ապարանի բաժնի պետ Աշոտ Հայրապետյանի, օպերգծով տեղակալ Հովհաննես Կարապետյանի գլխավորությամբ:

Դեպքի վայր էին ժամանել նաև ոստիկանության Արագածոտնի մարզի քննչական բաժնի քննիչները` բաժնի պետ Ալբերտ Երիցյանի գլխավորությամբ:

Քննչական աշխատանքները ղեկավարում էր քննչական բաժնի ավագ քննիչ Բագրատ Ադամյանը:

Օպերատիվ-քննչական աշխատանքների արդյունքում ոստիկանությունը պարզել է, որ նույն օրը Արագած գյուղում` 38-ամյա Ռոմիկ Մարկոսյանին պատկանող տան բակում, նույն գյուղի բնակիչներ 59-ամյա Գևորգ Գալստյանը և 33-ամյա Ավետիք Կարապետյանը վիճաբանել էին միմյանց հետ, որի ընթացքում Ավետիք Կարապետյանն իր ձեռքին եղած քարով հարվածել էր Գևորգ Գալստյանի գլխին, ով ստացված մարմնական վնասվածքներից մահացել էր:

Սպանություն կատարելուց հետո Ավետիք Կարապետյանը դիմել էր փախուստի:

Փաստի առթիվ նույն օրը ոստիկանության Արագածոտնի քննչական բաժնում հարուցվել է քրեական գործ` ՀՀ քրօր.-ի 104-րդ հոդվածի 1-ին մասի (սպանություն) հատկանիշներով:

Ձեռնարկված օպերատիվ-հետախուզական և քննչական գործողությունների արդյունքում նոյեմբերի 9-ին` ժամը 22.30-ին, ոստիկանության Ապարանի բաժնի աշխատակիցները հայտնաբերել և սպանություն կատարելու կասկածանքով բերման են ենթարկվել 33-ամյա Ավետիք Կարապետյանին:

Արագած գյուղում` սպանության վայրի հարևանությամբ ապրողները ֆոտոլրագրող Գագիկ Շամշյանին պատմել են, որ Ավետիք Կարապետյանը Ապարանի բժշկական կենտրոնի հոգեբուժական բաժանմունքում հաշվառված է մտավոր հետամնացություն ախտորոշմամբ:

Գյուղացիները պատմել են նաև, որ սպանություն կատարելուց հետո Ավետիք Կարապետյանը սպանվածի դիակը տեղափոխել և թողել է իրենց գյուղի 2-րդ փողոցի կամուրջի վրա:

Ավագ քննիչ Բագրատ Ադամյանի կողմից փաստի առթիվ նյութեր են նախապատրաստվում:

Նշանակվել են մի շարք փորձաքննություններ, այդ թվում` դիակի դատաբժշկական, հետքաբանական, մատնադրոշմային:

Սպանություն կատարելու կասկածանքով Ավետիք Կարապետյանը ձերբակալվել է:

Լուսանկարները և տեսանյութը` Գագիկ Շամշյանի