Ռուսաստանը չի պատրաստվում խաթարել ԵԱՀԿ Մինսկի խումբը. Տարասով

Ղարաբաղում քառօրյա պատերազմից հետո ուժեղացել են ներկա հակամարտության կարգավորմանն ուղղված դիվանագիտական մանևրները, գրում է ИА REGNUM-ում Ստանիսլավ Տարասովը:

Բանակցությունները դեռ չեն սկսվել, և ոչ ոք չգիտի, թե ինչպես, երբ և ինչ ձևաչափով նրանք կսկսվեն: ՀՀ նախագահի մամուլի քարտուղար Վլադիմիր Հակոբյանը տեղեկացրեց, որ «Երևանը ԵԱՀԿ Մինսկի խմբի համանախագահների հետ չի քննարկել Լեռնային Ղարաբաղի հակամարտության կարգավորման վերաբերյալ բարձր մակարդակով հանդիպման հնարավորությունը և ժամկետները»: Մինչդեռ, Բաքվի ԶԼՄ-ները՝ հղում անելով «դիվանագիտական աղբյուրներին», հայտնում են այն միտքը, որի համաձայն «Կրեմլը՝  իր միջնորդությամբ, պատրաստում է Հայաստանի և Ադրբեջանի նախագահների հանդիպումը», այն հանդիպման նման, որն անցկացվել է 2014 թ. Սոչիում: Միևնույն ժամանակ, հատուկ ուշադրություն է դարձվում նրան, որ «հնարավոր գագաթնաժողովը տեղի չի ունենա ԵԱՀԿ Մինսկի խմբի հովանու ներքո»:

Այդ ինտրիգը փոխանցվել է նաև որոշ ռուսական ԶԼՄ-ներին: Այսպիսով, «Իզվեստիա» թերթը՝ հղում անելով արդեն ռուսական «դիվանագիտական աղբյուրին», հիշատակում է ինչ-որ «ռուսական ծրագիր»՝ «Բ» տարբերակի տեսակ՝ «Ադրբեջանին տարածքի մի մասը վերադարձնելու, հակամարտության գոտում խաղաղապահներ մտցնելու, փախստականներին վերադարձնելու և Ղարաբաղն օրինականացնելու համար (այսինքն՝ ապահովել սահմանների բացումը և տնտեսական կապերի վերականգնումը), ապա, երբ կրքերը կմարեն, տարածաշրջանի պատկանելիության շուրջ հանրաքվե անցկացնել»: Բայց դրանք, ըստ էության, հենց այն թարմացված Մադրիդյան սկզբունքներն են, որոնք այժմ հակամարտության կարգավորմանն ուղղված բանակցային գործընթացի հիմքում են ընկած, որն իրականացվում է ԵԱՀԿ Մինսկի խմբի միջնորդությամբ, այլ ոչ թե գործողությունների ինչ-որ «պահեստային պլան», որը մշակված է Ռուսաստանի կողմից: Հետևաբար, ներկայումս չկան հիմքեր ենթադրելու, որ Մոսկվայի միջնորդությունն ուղղված է ԵԱՀԿ Մինսկի խմբի «խաթարմանը», ինչպես դա փորձում են ներկայացնել որոշ ադրբեջանցի քաղաքական գործիչներ: