Ալիևների քաղբանտարկյալների «հրաշալի հարահոսը». ծաղրանկարչի բացահայտումը

Ադրբեջանի նախագահ Իլհամ Ալիեւը անմեղ մարդկանց նետում է բանտերը, իսկ նրա կինը' խորհրդարանի պատգամավոր Մեհրիբան Ալիեւան հանդես է գալիս ներման մասին նախաձեռնություններով:

Ինչպես հաղորդում է «Արմենպրես»-ը' վկայակոչելով Meydan TV ինտերնետային հեռուստաալիքի կայքը, այդ իրողությունը բացահայտող ծաղրանկար է հրապարակել ադրբեջանցի ծաղրանկարիչ Շաիք Ջաֆարովը:

«Այսպիսով, ամուսինը' նախագահ Ալիեւը շինծու մեղադրանքներով անմեղ մարդկանց նստեցնում է բանտերում, իսկ նրա կինը' Հեյդար Ալիեւի անվան բարեգործական հիմնադրամի նախագահ, խորհրդարանի պատգամավոր Մեհրիբան Ալիեւան հանդես է գալիս ներման մասին նախաձեռնություններով, որոնցով ազատ են արձակում որոշ աղմկահարույց քաղբանտարկյալների: Ամնիստիայով եւ ներումներով նախագահ Ալիեւը լուծում է իր արտաքին քաղաքական խնդիրները' չեզոքացնելով երկրում մարդու իրավունքների զանգվածային խախտումների հետ կապված արտասահմանից իր վրա ճնշումը, իսկ առաջին տիկին Մեհրիբ ան Ալիեւան բարեգործի իր վարկանիշը պահպանում է նման հարահոսի շնորհիվ», -գրում է կայքը' նշելով, որ Շաիք Ջաֆարովի ծաղրանկարը նվիրված է Ադրբեջանում Ալիեւների ստեղծած հենց այդ պարադոքսային իրավիճակին:

Կայքը գրում է, որ «Ազատություն» ռադիոկայանի ադրբեջանական ծառայության հետազոտող-լրագրող Խադիջա Իսմայիլովայի պայմանական ազատումը բանտից Ալիեւները կատարել են միջազգային հզոր ճնշման շնորհիվ: Իսկ այսօր նույն Ալիեւների հանձնարարությամբ Բաքվում ձերբակալվել են NIDA երիտասարդական շարժման ակտիվիստ Ամիդ Սուլեյմանովը եւ լրագրող Էլնուր Մուխտարը:

Վերջին շաբաթվա ընթացքում Ադրբեջանում դա երրորդ երիտասարդ ակտիվիստի ձերբակալությունն է: Ավելի վաղ Հեյդար Ալիեւի արձանի պատվանդանի կողերին ադրբեջաներեն եւ անգլերեն Qul Bayramınız MՖbarək (Շնորհավորում ենք ստրուկի օրվա առթիվ), իսկ առաջնակողմում' Fuck the system (Կորչի համակարգը) գրություններ անելու համար ձերբակալվել են NIDA-ի ակտիվիստ Բայրամ Մամեդովն ու «Ձախ ճակատի» անդամ Գիյաս Իբրահիմովը:

Օրերս Մեհրիբան Ալիեւայի նախաձեռնությամբ Ադրբեջանի խորհրդարանը չորորդ համաներումն է հայտարարել, որով պետք է ազատ արձակվեն 3500 բանտարկյալներ, որոնց մեջ, սակայն, ոչ մի քաղբանտարկյալ չկա:

Մարտի վերջին ներում էր շնորհվել մի խումբ բանտարկյալների, որոնց մեջ 15 քաղբանտարկյալներ են եղել: Ալիեւն այդ առիթն օգտագործել էր Վաշինգտոնում միջուկային գագաթաժողովին մասնակցելու հրավեր ստանալու եւ նախագահ Բարաք Օբամայի ու պետքարտուղար Ջոն Քերիի հետ լուսանկարվելու համար:

Կայքը հիշեցնում է, որ միջազգային կազմակերպություններն Իլհամ Ալիեւին «Մամուլի թշնամի» են հայտարարել:

Meydan TV-ն ավելի վաղ Ալիեւների այսօրվա Ադրբեջանի մասին գրել էր.

«Ադրբեջանն այսօր մի երկիր է, որում ոստիկանության, անվտանգության ծառայությունների եւ դատախազության քննիչ-հետաքննիչները կարող են ժպիտը շուրթերին սեռական հարաբերություն կազմակերպել կասկածյալի կնոջ հետ նրա երեխաների եւ ազգականների ներկայությամբ:

Ադրբեջանն այսօր այն երկիրն է, որտեղ կասկածյալին կարող են սպառնալ ոստիկանական մահակի կիրառմամբ սեռական ակտով, եւ այդ սպառնալիքն իրականացնել տեսանկարահանումով ապագա շանտաժի համար:

Ադրբեջանն այսօր մի երկիր է, որում իշխանության մարմիններում, սկսած պետության ղեկավարից մինչեւ բանտապահ, «պատվի» եւ «խղճի» մասին խոսքերն ունեն ամենախեղաթյուրված իմաստը»:

Միջազգային եւ ադրբեջանական իրավապաշտպան կազմակերպությունները հայտնում են Ադրբեջանում 100-ից ավելի քաղբանտարկյալների առկայության մասին: