Վթարի է ենթարկվել հոկտեմբերի 27-ի գործով դատավորի որդին (ԹԱՐՄԱՑՎԱԾ` ՖՈՏՈ)

Այսօր ավտովթար է տեղի ունեցել Երևանում: Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նոյեմբերի 13-ին` գիշերը ժամը 2-ի սահմաններում, Երևանի Մյասնիկյան պողոտայում 26-ամյա Յուրի Ուզունյանը, վարելով իրեն պատկանող ՎԱԶ-21214 մակնիշի 80 ՏՏ 800 համարանիշի ավտոմեքենան, դուրս է եկել ճանապարհի երթևեկելի գոտուց և բախվել թիվ 38/4 հասցեի դիմացի սյանը:

Վթարի հետեւանքով Յ. Ուզունյանը և ավտոմեքենայում գտնվող ուղևոր 34-ամյա Շավարշ Իսպիրյանը մարմնական վնասվածքներով տեղափոխվել են Սուրբ Գրիգոր Լուսավորիչ բժշկական կենտրոն:

Վթարի վայրում հավաքվածները ֆոտոլրագրողին պատմել են, որ մինչ կժամանեին Երևանի ՃՈ աշխատակիցներն ու ոստիկանության քննչական գլխավոր վարչության ճանապարհատրանսպորտային հանցագործությունների քննության բաժնի քննիչները, անհայտ անձինք ավտոմեքենայի վրայից հանել էին համարանիշները: Վթարի վայրում  փորձել էին ոստիկանությանը մոլորության մեջ գցել, թե իբրեւ վարորդը եղել է այլ անձ:

Գագիկ Շամշյանը հայտնում է, որ վարորդը ծառայում է ՀՀ ՊՆ քննչական ծառայության 4-րդ կայազորային քննչական բաժնում, կոչումով ավագ լեյտենանտ է: Ֆոտոլրագրողին հայտնի է դարձել, որ Յ. Ուզունյանը հոկտեմբերի 27-ի գործով դատավոր, ներկայումս Ավան-Նոր Նորք վարչական շրջանների ընդհանուր իրավասության դատարանի նախագահ Սամվել Ուզունյանի որդին է:

Ավտոմեքենան ՃՏՀ քննության բաժնի քննիչ Խաչիկ Սամվելյանի հանձնարարականով, տեղափոխվեց Երևանի ՃՈ տուգանային հրապարակ: 

Լուսանկարները` Գագիկ Շամշյանի