Ադրբեջանում հալածում են Ռուսաստանի քաղաքացուն հայկական ծագման համար

Ռուսաստանի քաղաքացի Մարատ Ուելդանով-Գալուստյանը մոտ մեկուկես ամիս է, ինչ գտնվում է Ադրբեջանի բանտերից մեկում հայկական ծագման պատճառով: Այս մասին տեղեկացրեց ձերբակալվածի քույրը՝ Մարիանա Միրզոյանը, ում պնդմամբ՝ Ադրբեջանում Ռուսաստանի դեսպանությունից այդ ժամանակահատվածում որևէ մեկը դեռեւս եղբորը չի այցելել:

«Մարատի ձերբակալության մասին իմացել եմ նրա գործընկեր Ելենա Մակարենկոյից, ում նույնպես 15 օր պահել էին մեկուսարանում միայն նրա համար, որ եղբորս ընկերն է: Ադրբեջանցի ոստիկանները նրան ասել էին, որ պետք է կարողանա ընտրել ընկերների, այլ ոչ թե ընկերություն անել հայկական ծագում ունեցող մարդկանց հետ: Նրան ազատ էին արձակել, եւ հունիսի 25-ին Մոսկվա հասնելուց հետո նա անմիջապես ինձ հետ կապ էր հաստատել եւ ներկայացրել իրավիճակը»,- ասաց Մարիանա Միրզոյանը:

Մարատ Ուելդանով-Գալուստյանին ձերբակալել են հունիսի 9-ի Ադրբեջանի քրեական օրենսգրքի բավականին տարածված 234.4.3 հոդվածով, որը նախատեսում է պատիժ մեծ քանակությամբ թմրանյութերի անօրինական պատրաստման, արտադրության, ձեռք բերման, պահպանման, տեղափոխման համար: Մարիանա Միրզոյանի խոսքով՝ եղբայրը երբեւէ առնչություն չի ունեցել թմրանյութերի հետ:

«Նա միշտ նորմալ հարաբերություններ է ունեցել ադրբեջանցի գործընկերների հետ: Նա որոշակի ժամանակահատվածում աշխատել է Բաքվում, 2015 թվականին աշխատել է Եվրոպական օլիմպիական առաջին խաղերի շրջանակում, անընդմեջ գնացել, եկել է այնտեղ, սակայն նման խնդիր երբեւէ չի ունեցել: Եթե Ելենան մեզ չտեղեկացներ այդ մասին, երեւի այդպես էլ չէինք իմանա, որ նրան ձերբակալել էին, քանի որ Բաքու գնալուց հետո չենք կարողացել կապ հաստատել իր հետ»,- նշեց ձերբակալվածի քույրը:

Կատարվածի մասին իմանալուց հետո Մարիանա Միրզոյանն անմիջապես դիմել է Բաքվում Ռուսաստանի դեսպանատուն, որտեղ նրան պատասխանել են, որ ձերբակալության վերաբերյալ որեւէ պաշտոնական հաղորդագրություն չեն ստացել:

«Ինչպես է հնարավոր նման բան, եթե խոսքը Ռուսաստանի քաղաքացու մասին է, հատկապես այն դեպքում, երբ Ելենան ինձ տեղեկացրել էր, որ նախքան Մոսկվա վերադառնալը նա դիմել է Ռուսաստանի դեսպանատուն եւ տեղեկացրել, որ ձերբակալել են իրենց երկրի քաղաքացուն: Ելենային խոստացել են զանգահարել, սակայն այդպես էլ ոչ մի տեղեկություն չեն տվել:

Եղբայրս արդեն մեկուկես ամիս է' Բաքվում է, եւ մենք նրանից տեղեկություն չունենք, այս ընթացքում Ռուսաստանի դեսպանատնից դեռեւս նրան չեն այցելել՝ պատճառաբանելով, որ չունեն թույլտվություն»,- տեղեկացրեց Մարիանա Միրզոյանը:

Մարիանան նաև նամակ է գրել և փոստով ուղարկել Բաքվում Ռուսաստանի դեսպանատուն՝ այն եղբորը փոխանցելու խնդրանքով:

«Ես ուզում էի, որ այդ նամակը եղբայրս անպայման ստանար, որպեսզի նա իմանար, որ մենք տեղյակ ենք եւ զբաղվում ենք այս հարցով, քանի որ նա նույնիսկ չգիտի էլ՝ իր հարազատները տեղյակ են իր այդ վիճակից, թե ոչ: Մտածում էի՝ նամակը կկարդա, ձեռագիրս կճանաչի եւ գոնե մի փոքր իրեն լավ կզգա: Սակայն դեսպանի քարտուղարներից Սերգեյ Վոլֆը ինձ հարցրել է, թե արդյոք հնարավոր է ասելիքը բանավոր փոխանցել, քանի որ նամակը փոխանցելը շատ խնդրահարույց է: Ես պարզապես զարմացած էի. նրանց ասացի, որ նման խնդիր չի կարող առաջանալ, քանի որ ըստ օրենքի՝ նրան թույլատրվում է ստանալ այդ նամակը»,-ասաց նա:

Ադրբեջանում Ռուսաստանի դեսպանատան՝ Մարիանա Միրզոյանին ուղղված պատասխան նամակում, մասնավորապես, ասված է.

«Հայաստանի եւ Ադրբեջանի զինված հակամարտության պայմաններում Ձեր եղբոր հայկական ծագումը անչափ բարդացնում է նրա պաշտպանությունը»:

Մարիանա Միրզոյանը նաեւ տեղեկացրեց, որ նրանք ծնվել են Բաքվում, ընտանիքը Բաքվի փախստականներից է, սակայն 6 տարեկանից ապրել են ՌԴ-ում:

«Մարատը վերցրել էր կնոջ ազգանունը, եւ չէր էլ ենթադրում, որ կարող է ինչ-որ խնդիր առաջանալ, իսկ որեւէ բան իմանալու դեպքում էլ մտածում էր՝ երկրի տարածք չեն էլ թողնի, միանգամից հետ կուղարկեն»,- նշեց Մարիանա Միրզոյանը:

Ձերբակալվածի քույրը տեղեկացրեց, որ դիմել է տարբեր գերատեսչություններին՝ ՌԴ արտգործնախարարություն, գլխավոր դատախազություն, ներքին գործերի նախարարություն, անվտանգության դաշնային ծառայություն այն հույսով, որ հարցին հնարավոր կլինի ինչ-որ լուծում տալ:

«Նախքան Բաքու մեկնելը նա որոշակի առողջական խնդիրներ ուներ: Մենք չգիտենք՝ ինչ վիճակում է եղբայրս, չգիտենք՝ արդյոք ողջ է, թե չէ: Մեր միակ աղբյուրը Ադրբեջանում ՌԴ դեսպանատունն է, որից պատշաճ պատասխան չենք էլ կարողանում ստանալ: Զանգում ենք, հարցնում եղբորս հարցով պատասխանատուին, իսկ նա կա՛մ տեղում չէ, կա՛մ ասում են՝ վաղը զանգեք»,-նշեց Մարատ Ուելդանով-Գալուստյանի քույրը:

Ադրբեջանի քրեական օրենսգրքի 234.4.3 հոդվածը բավականին տարածված է:

Դեռեւս 2015 թվականին ընդդիմադիր «Ադրբեջանի ազգային ճակատ» կուսակցության երիտասարդական թևի անդամ Էլվին Աբդուլլաևը դատապարտվել էր 6 տարվա ազատազրկման հենց 234.4.3 հոդվածով:

Նախկինում եւս գրանցվել են բավականին շատ դեպքեր, երբ Ադրբեջանը ձերբակալել կամ արգելել է հայազգի օտարերկրացիների մուտքը երկիր, ինչպես օրինակ Ռուսաստանի եւ Ամերիկայի քաղաքացի Դիանա Մարկոսյանի հետ տեղի ունեցած դեպքը:

2011 թվականին ամերիկյան «Բլումբերգ գործակալության ֆոտոթղթակից Դիանա Մարկոսյանին Բաքվից արտաքսել էին Ստամբուլ հայկական ծագման պատճառով, ինչը հաստատել էր Ադրբեջանի արտգործնախարարությունը: «Հայկական ծագում ունեցող Դիանա Մարկոսյանի՝ Ադրբեջանում գտնվելու ժամանակահատվածում խնդիրներ կլինեն կապված նրա անվտանգության ապահովման հետ»,-ասված է եղել հաղորդագրության մեջ: