Պուտինը, Ռոուհանին և Ալիևը Բաքվում հռչակագիր են ընդունել

Ռուսաստանի, Իրանի և Ադրբեջանի նախագահները Բաքվում տեղի ունեցած հանդիպման արդյունքներով հռչակագիր են ընդունել:

Ինչպես հաղորդում է «ՌԻԱ Նովոստի» գործակալությունը, փաստաթղթում նշվում է կողմերի պատրաստակամութունը «ահաբեկչությանը, ծայրահեղականությանը, միջազգային կազմակերպված հանցավորությանը, զենքի, թմրամիջոցների անօրինական շրջանառությանը, մարդկանց առևտրին և տեղեկատվական տեխնոլոգիաների ոլորտում հանցագործություններին հակազդելը»:

Բացի այդ, կողմերը ընդունում են, որ «չկարգավորված հակամարտությունները տարածաշրջանում լուրջ խոչընդոտ են տարածաշրջանային համագործակցության համար», և ընդգծում են «դրանց կարգավորման անհրաժեշտությունը' միջազգային իրավունքի նորմերի և սկզբունքների հիման վրա»:

«Կողմերը կշարունակեն իրավահավասար և փոխշահավետ համագործակցության բազմակողմանի զարգացումը, ինչպես նաև կխորացնեն և կընդլայնեն փոխադարձ հետաքրքրություն ներկայացնող հարցերի ամբողջ սպեկտրով տարբեր մակարդակների վրա քաղաքական երկխոսությունը», -ասվում է փաստաթղթում:

Երեք երկրների առաջնորդները նաև պայմանավորվել են խորացնել համագործակցությունը տնտեսության տարբեր ոլորտներում «իրավահավասարության և փոխադարձ շահի սկզբունքների հիման վրա»:

ՌԴ նախագահ Վլադիմիր Պուտինը կարևորել է Բաքվում Իրանի, Ադրբեջանի և Ռուսաստանի ղեկավարների եռակողմ գագաթաժողովի անցկացումը՝ ընդգծելով, որ երեք երկրների առաջ կանգնած են նմանատիպ խնդիրներ և մարտահրավերներ, ինչպիսին շարունակվող գլոբալ տնտեսական ճգնաժամն է:

«Այսօր մենք, անկասկած, նոր էջ ենք բացում մեր հարաբերություններում, եռակողմ ձևաչափով փոխգործողությունների մեկնարկ ենք տալիս: Մեր կարծիքով նման ձևաչափի պահանջվածությունն ակնհայտ է. երեք երկրներին էլ միավորում է պատրաստակամությունը կոորդինացնել մոտեցումները լայն շրջանակի տարածաշրջանային և գլոբալ հարցերի շուրջ, ձգտումը' հետագայում ևս զարգացնել առևտրա-տնտեսական ոլորտում բամզապլան գործնական համագործակցությունը», -եռակողմ հանդիպման ժամանակ ասել է ՌԴ նախագահը: