Քալանթարյանները կատարեցին իրենց խոստումը. գաջի փոշին, աղմուկը և առյուծների մռնչոցն այլևս չեն խանգարի բնակիչներին

Այսօր՝ նոյեմբերի 14-ին, Երևանի Էրեբունի վարչական շրջանի Գաջի գործարանում՝ «Գաջեգործ» ՓԲԸ-ում, հավաքված են մեծ թվով աշխատակիցներ, ովքեր արդեն մի քանի օր է նշված գործարանի գաջի արտադրամասում տեղադրել են ֆիլտրեր:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված ֆիլտրերով կարգավորվում է գործարանից արտանետումների խնդիրը, ինչը, ըստ մասնագետների, լիովին համապատասխանում է միջազգային ստանդարտներին:

Ֆիլտրերից մեկն արդեն ամբողջովին տեղադրված է, երկրորդը կտեղադրվի 10 օրվա ընթացքում:

Նշված ֆիլտրերն ապահովում են գործարանից փոշու և վնասակար այլ նյութերի արտանետման բացառումը, ինչպես նաև ձայնամեկուսիչ են:

Ավելի վաղ ԼՈՒՐԵՐ.com-ին ֆոտոլրագրող Գագիկ Շամշյանը հայտնել էր, որ գործարանի հարևանությամբ բնակվող մարդիկ բողոքում էին, որ իրենց խանգարում են գործարանի արտանետած փոշին և աղմուկը:

Փորձագետները նշել են, որ ֆիլտրերի տեղադրումը մինչև 90 տոկոսով կնվազեցնի փոշու արտանետումը և կխլացնի աղմուկը:

Ի դեպ, բնակիչները նաև բողոքում էին, որ իրենց խանգարում են նաև գործարանի տարածքում պահվող առյուծների մռնչոցները, ինչը ևս լուծված է, քանի որ առյուծներին գործարանի ղեկավարությունը տեղափոխել է այդ տարածքից:

Ֆիլտրերից յուրաքանչյուրն արժե մոտ 20 միլիոն դրամ, հետևաբար' գործարանում բնապահպանական խնդիրների լուծման համար կատարվել և կատարվելու է մոտ 40 միլիոն դրամի ներդրում:

Ֆիլտրերի տեղադրման, ինչպես նաև Գաջի գործարանում սանիտարական կապիտալ վերանորոգման աշխատանքները ղեկավարում է անձամբ «Գաջեգործ» ՓԲԸ տնօրեն Արմեն Քալանթարյանը: Վերջինիս հետ են նաև 7-8 անձինք, ովքեր, ըստ ֆոտոլրագրող Գագիկ Շամշյանի, նման աշխատանքների կազմակերպման և իրականացման մասնագետներ են: