Լավրովն իր անհանգստությունն է հայտնել քրդերի դեմ իրականցվող գործողության վերաբերյալ

Թուրքիայի արտգործնախարար Մևլութ Չավուշօղլուն հեռախոսազրույց է ունեցել Ռուսաստանի իր պաշտոնակցի հետ: Հեռախոսազրույցի գլխավոր թեման, թուրքական «Haberturk» լրատվական կայքի փոխանցմամբ, եղել է Սիրիայի հարցը: ՌԴ արտաքին գործերի նախարար Սերգեյ Լավրովն իր անհանգստությունն է հայտնել Սիրիայի տարածքում թուրքական զորքերի կողմից իրականցվող գործողության վերաբերյալ:

Չավուշօղլուն Լավրովին տեղեկություններ է հաղորդել Թուրքիայի զինված ուժերի կողմից Սիրիայի տարածքում իրականացվող «Եփրատի վահան» օպերացիայի մասին և նշել, որ դրա ընթացքում հաջող գործողություններ են ընթանում «Իսլամական պետություն» ահաբեկչական կազմակերպության դեմ:

Թուրքական դիվանագիտությունը միշտ խորամանկ է եղել ու խորամանկ էլ մնում է: Տվյալ պարագայում ակնհայտ է, որ «Իսլամական պետությանը» հասցվող հարվածներով Թուրքիային հաջողվել է Սիրիայում քրդերի դեմ իր գործողությունների համար Ռուսաստանի զայրույթին արժանանալու փոխարեն, նրա կամ նրա արտգործնախարարի ընդամենը անհանգստությունը հարուցել:

Կողմերը, բացի վերը նշվածից, քննարկել են ճգնաժամը քաղաքական ճանապարհով լուծելու ջանքերը, ինչպես նաև Սիրիայում մարդասիրական օգնության ավելացման և կրակի դադարեցման հարցերը:

Թուրքական աղբյուրի հաղորդմամբ, Լավրովը և Չավուշօղլուն հեռախոսազրույցի ընթացքում պայմանավորվել են մոտ ժամանակներս հանդիպել: