Նոր մանրամասներ Խանջյան փողոցում տեղի ունեցած վթար–վրաերթից. «Մերսեդես»-ի վարորդը եղել է ոչ սթափ վիճակում (ԹԱՐՄԱՑՎԱԾ՝ ՖՈՏՈՇԱՐՔ, ՏԵՍԱՆՅՈՒԹ)

Գագիկ Շամշյանը հայտնում է 15 Նոյեմբեր, 2011 10:43

Ինչպես երեկ՝ նոյեմբերի 14-ին դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 20.30-ի սահմաններում Խանջյան փողոցում Վարդան Մամիկոնյանի արձանի դիմաց Մերսեդես C 180 մակնիշի 29 ԼՍ 226 համարանիշի ավտոմեքենայի վարորդը դուրս էր եկել երթեւեկելի գոտուց, հարվածել մայթեզրին կայանված «ԳԱԶ 3110» մակնիշի «Վերնիսաժ» տաքսի ծառայությանը պատկանող Տ 0187 համարանիշի ավտոմեքենային, այնուհետեւ Մերսեդեսը հայտնվել էր մայթին եւ բախվել ՎԱԶ 21214 մակնիշի 61 ՕՕ 770 համարանիշի ավտոմեքենային:

Վթարի վայրում հավաքվածները ֆոտոլրագրողին հայտնել էին, որ վթարից հետո Մերսեդեսի վարորդը դիմել էր փախուստի, իսկ շտապօգնության ավտոմեքենաները մի քանի հոգու տեղափոխել էին հիվանդանոց:

Քիչ առաջ ֆոտոլրագրող Գագիկ Շամշյանը ԼՈՒՐԵՐ.com-ին հայտնեց, որ ոստիկանությունը պարզել է վթար-վրաերթի վերաբերյալ նոր մանրամասներ:

«Մերսեդես C 180» մակնիշի 29 ԼՍ 226 համարանիշի ավտոմեքենայի վարորդը` 25-ամյա Գեղամ Խաչատրյանը, ով այսօր մեղայականով ներկայացել է ոստիկանություն և խոստովանել, որ վթար-վրաերթի հեղինակը ինքն է, բախվել է Խանջյան փողոցի թիվ 13 շենքի դիմաց` մայթեզրին, կայանված, «Բաբկեն և Տաթև» ՍՊԸ-ին պատկանող «ԳԱԶ 3110» մակնիշի Տ 0187 համարանիշի ավտոմեքենային, որի ղեկին եղել է նշված ՍՊԸ-ում որպես վարորդ աշխատող, 46-ամյա Հայկազ Միքայելյանը:

Բախման հետևանքով «ԳԱԶ 3110»-ը դուրս է եկել ճանապարհի երթևեկելի մասից և վրաերթի ենթարկել կանգառում կանգնած 17-ամյա Գևորգ Մխիթարյանին, 18-ամյա Դավիթ Սարգսյանին և 17-ամյա Կարեն Ասատրյանին:

«ԳԱԶ 3110»-ին բախվելուց հետո «Մերսեդես» մակնիշի ավտոմեքենան բախվել է նաև «Թուգա Քոմփնի» ՍՊԸ-ի տնօրենի օգնական, 28-ամյա Գրիգոր Վարդանյանի կողմից վարած «ՎԱԶ 2121» մակնիշի 61 ՕՕ 770 համարանիշի ավտոմեքենային:

Վրաերթի ենթարկվածները մարմնական վնասվածքով տեղափոխվել էին Երևանի թիվ 1 համալսարանական հիվանդանոց:

Դեպքի վայր էին ժամանել Երեւանի ճանապարհային ոստիկանության աշխատակիցները:

Քննչական աշխատանքները ղեկավարում էր ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի քննիչ Արսեն Մարգարյանը:

Նրա հանձնարարականով ավտոմեքենաները տեղափոխվել են Երեւանի ՃՈ տուգանային հրապարակ: Փաստի առթիվ ՃՏ քննության բաժնում նյութեր են նախապատրաստվում:

Քննիչի որոշմամբ, «Մերսեդես» մակնիշի ավտոմեքենայի վարորդը ենթարկվել էր բժշկական հետազոտման, և պարզվել էր, որ նա եղել էր ոչ սթափ վիճակում:

Լուսանկարները և տեսանյութը՝ Գագիկ Շամշյանի