Թուրքիայի հյուպատոսը փորձել է տապալել ցեղասպանության զոհերի հիշատակին նվիրված պատարագը

Վիետնամում ՀՀ դեսպանության նախաձեռնությամբ Ֆիլիպինների մայրաքաղաք Մանիլայի Սանտուարիո դե Սեն Անտոնիո եկեղեցում մատուցվեց Սուրբ Պատարագ՝ Հայոց ցեղասպանության զոհերի հիշատակին: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:

Պատարագին ներկա էին Ֆիլիպինների խորհրդարանի սենատորներ, Մանիլայի քաղաքային իշխանությունների ներկայացուցիչներ, Թագուկ քաղաքի քաղաքապետը, երկրում հավատարմագրված դիվանագիտական ներկայացուցչությունների ղեկավարներ, Հայաստան-Ֆիլիպիններ բարեկամության խմբի անդամներ: Պատարագից հետո Մանիլայի «Աստորիա» հյուրանոցում տեղի ունեցավ հիշատակի երեկո, որի ընթացքում ելույթներով հանդես եկան Ֆիլիպիններում ՀՀ դեսպան Ռաիսա Վարդանյանը և հայտնի գործարար Ջեֆրի Նագը:

Մանիլայի Սանտուարիո դե Սեն Անտոնիո եկեղեցում սեպտեմբերի 27-ին կայանալիք պատարագի խափանման ուղղությամբ աշխատանքներ էին իրականացվում Մանուլայում Թուրքիայի հյուպատոսի կողմից: Վերջինս այդ հարցի առնչությամբ կապ էր հաստատել եկեղեցու առաջնորդի հետ և զրույցի ժամանակ նշել, որ պատարագը հայերի կողմից կազմակերպվող քաղաքական ակցիա է, որը «պետք է արգելվի՝ հետագա քաղաքական հետևանքներից խուսափելու համար»:

Մեր տեղեկություններով՝ Թուրքիայի դեսպանությունը բողոք է հղել նաև Ֆիլիպինների արտաքին գործերի դեպարտամենտին:

Այնուամենայնիվ, Ֆիլիպիններում ՀՀ դեսպանության կազմակերպմամբ սեպտեմբերի 27-ին անցկացվեց պատարագ, որին հետևած միջոցառման ժամանակ մասնակիցներին ներկայացվեց հակիրճ հուշագիր Հայոց պատմության և ցեղասպանության մասին: