Ինքնակամ ոստիկանություն է ներկայացել Ոստիկանության Էրեբունու բաժնի պետի նախկին տեղակալը

Երեկ՝ նոյեմբերի 14-ին, ոստիկանություն է ներկայացել Միհրան Քեշիշյանը: Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, Միհրան Քեշիշյանը կասկածվում է քաղաքացուց կաշառք վերցնելու մեջ:

Նշենք, որ ՀՀ ոստիկանության ԿՀԴՊ գլխավոր վարչությունում նախապատրաստված նյութերի հիման վրա 2011թ. նոյեմբերի 5-ին ՀՀ քրեական օրենսգրքի 311-րդ հոդվածի 4-րդ մասի 2-րդ կետի, 312-րդ հոդվածի 3-րդ մասի 1-ին կետի և 38-312-րդ հոդվածի 3-րդ մասի 1-ին կետի հատկանիշներով քրեական գործ է հարուցվել միջնորդների միջոցով մի քաղաքացու քրեական պատասխանատվությունից ազատելու համար Երևան քաղաքի վարչության Էրեբունու բաժնի պետի օպերատիվ գծով տեղակալ Միհրան Քեշիշյանին 13.000 ԱՄՆ դոլար կաշառք տալու դեպքի առթիվ:

Գործով կատարվել էին քննչական և օպերատիվ անհետաձգելի գործողություններ:

Միհրան Քեշիշյանին որպես մեղադրյալ ներգրավելու որոշում էր կայացվել, խափանման միջոց էր կիրառվել կալանավորում և հայտարարվել էր հետախուզում:

Սակայն կասկածյալը երեկ ինքնակամ ներկայացել էր իրավապահներին:

Այս պահին կասկածյալը տեղափոխվել է Ձերբակալվածների պահման վայր: