Պարզվել է Երևանյան լճում ինքնասպան եղած տղամարդու ինքնությունը (ֆոտո, տեսանյութ)

Այսօր՝ նոյեմբերի 16-ին, ոստիկաններին հաջողվել է պարզել նոյեմբերի 13-ին Երևանյան լճում ինքնասպան եղած տղամարդու ինքնությունը:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ոստիկանության Շենգավիթի բաժնի աշխատակիցների կողմից ձեռնարկված օպերատիվ-քննչական գործողությունների արդյունքում պարզվել է, որ ինքնասպան եղածը Տավուշի մարզի Կոթի գյուղի բնակիչ, 32-ամյա Կարեն Խաչատրյանն էր:

Հիշեցնենք, որ նոյեմբերի 13-ին ինքնասպանություն էր տեղի ունեցել Երևանում:

Ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 16.30-ի սահմաններում Երևանյան լճի մոտ էին հավաքվել ոստիկանության Շենգավիթի բաժնի մեծ թվով աշխատակիցներ, ինչպես նաև Արտակարգ իրավիճակների նախարարության Հայաստանի փրկարար ծառայության Երևանի փրկարարական և հրշեջ ջոկատների փրկարարներն ու հրշեջները:

Ականատեսները ֆոտոլրագրողին պատմել են, որ միջին տարիքի' 30-40 տարեկան մի տղամարդ իջել է երթուղային տաքսուց, այնուհետև ուղղվել է դեպի Երևանյան լճի կողմը, կոստյումը թողելով լճի ափին նետվել է Երևանյան լիճը:

Դեպքի վայր են ժամանել նաև ջրասուզակները, ովքեր հաշված րոպեների ընթացքում լճից դուրս բերեցին տղամարդու դին:

Այս պահին դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության Շենգավիթի քննչական բաժնի ավագ քննիչ Կամո Շառոյանը:

Այս պահին նյութեր են նախապատրաստվում. քննչական մարմինը ձեռնարկում է համապատասխան գործողություններ' պարզելու ինքնասպանի ինքնությունը:

Թեպետ կոստյումի գրպանում հայտնաբերվել է սոցիալական քարտ, լուսանկարներ, բլոկնոտ, սակայն դեռևս հաստատված չէ ինքնությունը:

Դեպքի վայր է ժամանել նաև դիակ տեղափոխող բրիգադը, որպեսզի դին տեղափոխեն դիահերձարան:

Երևանյան լճի մոտ գտնվող կամուրջի վրա առաջացել էր հսկայական խցանում. այն վերացնելու համար դեպքի վայր էին ժամանել Երևանի ճանապարհային ոստիկանության մեծ թվով աշխատակիցներ' Երևանի ՃՈ պետ Արսեն Մարդոյանի գլխավորությամբ:

Լուսանկարները և տեսանյութը՝ Գագիկ Շամշյանի