Տեսակետը, թե ՀՅԴ-ն կազդի հող հանձնելու որոշման վրա, բլեֆ է. քաղաքագետ

Քաղաքագետ Լևոն Շիրինյանը ՀՀԿ-ՀՅԴ կոալիցոն համագործակցությունից որևէ դրական տեղաշարժ չի ակնկալում, քանի որ դրական առաջընթաց արձանագրելու համար կոալիցիա պետք է կազմեին նույնանման արժեհամակարգ ունեցող կուսակցություններն, ինչն այս պարագայում բացակայում է. «Այս երկու կուսակցությունների ղեկավարներն են միայն գաղափարակից, իսկ կուսակցական անդամները բացարձակապես տարբեր արժեհամակարգերի կրողներ են, նրանց սոցիալական, քաղաքական բազաները տարբեր են, ավելին՝ հակադիր են նրանք որպես քաղաքական կառույցներ: Հետևաբար, այս երկու հակառակ բևեռները կարող էին կոալիցիա կազմել միայն ու միայն երկրի ազգային անվտանգությանը սպառնացող վտանգի և արտակարգ դրության պարագայում: Հիմա, փաստացի, նման աղետալի վիճակ չկա՝ իսկ իրականում՝ այս կուսակցությունների համագործակցությունից է երկրի վիճակն աղետալի դառնում»:

Դիտարկմանը՝ հնարավոր է, որ խորհրադարանում բացարձակ մեծամասնություն ունեցող «Հանրապետական» կուսակցությունը գնաց կոալիցիայի՝ դաշնակցականների ընդվզումից խուսափելու և սփյուռքի կառույցներից եկող բացասական արձագանքները կանխելու համար, քաղաքագետը պատասխանեց. «100 % այս հանգամանքը կա: Բայց սա երկրորդականն է, իսկ առաջինն ու գլխավորը ՀՀԿ-ի կողմից տարվող՝ ժողովրդի համար ոչ նպաստավոր քաղաքականության, օլիգարխայի շահերի պաշտպանության համար հակառակորդ չունենալն է, դրա համար էլ  աշխատավորության շահերի պաշտպանության համար ստեղծված Դաշնակցության հետ կոալիցիա կազմեցին՝ թույլ տալով նրանց կերակրվել իրենց կերակրամանից: Եթե մինչ կոալիցիան սփյուռքի կառույցները կբողոքեին Սերժ Սարգսյանի դեմ և ՀՅԴ-ն էլ կմիանար այդ ընդվզմանը, ապա կոալիցիա կազմելուց հետո, փաստորեն, ՀՅԴ-ն այդ բողոքի ալիքը կչեզոքացի»: 

Լևոն Շիրինյանի համոզմամբ՝ կոալիցոն գործընկեր չլինելու պարագայում Հայ հեղափոխական դաշնակցությունը կարող էր դառնալ լուրջ ընդդիմություն և այդ դաշտում կկարողանար շատ ուժեղ և կազմակերպված լինել. «Դաշնակցության ընդդիմություն լինելու պարագայում կտապալվի ցանկացած իշխանություն, ասվածի ապացույցը ՀՀ առաջին նախագահ Լևոն-Տեր Պետրոսյանի հեռացումն էր իշխանությունից»: 

Հաշվի առնելով Արցախի համակամարտության խնդիրն ու Ադրբեջանի պահանջն Արցախից՝ հնարավո՞ր է արդյոք ոչ մի թիզ հող թեզի ջատագով դաշնակցականները  ՀՀԿ-ին դեմ գնան՝ պարտադրված քայլ որակվող հող հանձելու գործընթացի ժամանակ, քաղաքագետը պատասխանեց. «Չեն կարող որևէ կերպ ազդել Սերժ Սարգսյանի որոշման վրա, եթե լինեին ընդդիմություն, այն ժամանակ ամեն կերպ կխանգարեին այդ գործընթացին, բայց հիմա այլևս չեն կարող: Այն տեսակետը՝ թե ՀՅԴ-ն կազդի հող հանձնելու որոշման վրա, բլեֆ է: Բոլոր դեպքերում՝ որոշողը Սերժ Սարգսյանն է լինելու, իսկ ՀՅԴ-ն դեմ չի գնա, քանի որ հազիվ նրան տրվել է հնարավորություն՝ կերակրվելու»: 

Աղավնի Սուքիասյան