Ոստիկանությունը 20:00-ի դրությամբ իրավախախտումների վերաբերյալ ստացել է 69 ահազանգ

Երևանի ավագանու ընտրությունների օրը' ժամը 20:00-ի դրությամբ, ՀՀ ոստիկանությունում ստացվել է 69 ահազանգ: Այս մասին լրագրողների հետ հանդիպման ժամանակ ասաց ՀՀ ոստիկանության պետի աշխատակազմի ղեկավար, ոստիկանության գնդապետ Մերուժան Հակոբյանը:

Նրա խոսքով՝ 3 ահազանգ վերաբերվել են ընտրակաշառքին, 3-ը՝ ընտրողի կողմ կամ դեմ քվեարկելու, մասնակցել կամ մասնակցելուց հրաժարվել պարտադրելուն, 14-ը քաղաքացու ազատ ընտրական իրավունքը խոչընդոտելուն, 5 դեպք՝ խուլիգանական արարքներին, 4 դեպք՝ ընտրական հանձնաժողովի թեկնածուի կամ նրա վստահված անձի, դիտորդի, կուսակցության լիազորված անձի լիազորությունների խոչընդոտելուն, 17 դեպք՝ մեկից ավելի անգամ կամ անհայտ անձի փոխարեն քվեարկելուն, 4 դեպք՝ քվեարկության գաղտնիությունը խախտելուն, 2 դեպք՝ լրագրողի մասնագիտական օրինական գործունեությանը խոչընդոտելուն և 17-ն' այլ իրավախախտումներին:

«69 դեպքից 17-ով արդեն նախապատրաստվում են նյութեր, իսկ 52-ով դեռևս կատարվում են ստուգումներ: Ըստ աղբյուրների՝ 69-ից երկուսը ստացվել են քաղաքացիներից, 16-ը՝ ոստիկանության ծառայողների զեկուցագրերի հիման վրա, 29-ը՝ ԶԼՄ-ների հրապարակումներն են, 6-ը դիտորդների կողմից են ներկայացվել, մեկը՝ հանձնաժողովի անդամի կողմից, 11-ը՝ կուսակցության, կուսակցության դաշինքի կամ վստահված անձի կողմից և 4-ը՝ այլ աղբյուրներից»,- ասաց Հակոբյանը: