Արծվիկ, այս խայտառակությո՞ւնն էր Ձեր երազանքը, որն իրականացնելու համար դեռ մի բան էլ շնորհակալություն եք հայտնում

«Եվրատեսիլ»-ի այս տարվա խայտառակ պարտության մասին խոսելն արդեն ավելորդ է: Ամեն ինչ այնքան վատ էր, որ անգամ Հանրայինը, իրեն հատուկ պնդաճակատությամբ, չի խոսում բարոյական հաղթանակի կամ փայլուն ելույթի մասին գուցե այն բացատրությամբ, որ ելույթից փայլուն էր, թերևս, միայն Արծվիկի զգեստը:

Երբեք չէի տեսել, որ Հայաստանում այսքան անտարբեր լինեին «Եվրատեսիլ»-ի ու մեր մասնակցի նկատմամբ: Եթե նախորդ տարի ամբողջ ֆեյսբուքը ողողված էր Իվետա Մուկուչյանին սատարող գրառումներով, ապա այս տարի նկատելի էր, որ շատերը նույնիսկ չէին հիշում «Եվրատեսիլ»-ի օրը:

Թեպետ այս առումով էլ պետք է փաստել, որ Գոհար Գասպարյանը և Ավետ Բարսեղյանը «Եվրատեսիլ»-ի եզրափակիչն անցնելը քառատոն համարելով' իրենցից անկախ այնպես արեցին, որ «Եվրատեսիլ»-ի մասին մոռանալ հնարավոր չեղավ:

Իրականում Արծվիկի դեմ ոչինչ չունեմ, նույնիսկ կարծում եմ, որ լավ երգչուհի է, սակայն դա դեռ բավական չէր «Եվրատեսիլ» գնալու ցանկություն հայտնելու համար: Մեկ բառով' նա ձանձրալի էր ու ամենևին պատճառն այն չէր, որ շոու չկար, ի վերջո, չմոռանանք այս տարվա հաղթողին: Արծվիկի երգը շարքային չհիշվող երգ է, որը կարող էր տեղ գտնել Արծվիկի ձայնասկավառակում, որի հիման վրա նույնիսկ տեսահոլովակ նկարահանելն էր ափսոս, ուր մնաց «Եվրատեսիլ» գնալը…

Ինչ խոսք, հեծանիվ չեմ հորինում և ասում եմ բացարձակ ճշմարտություններ, բայց հիմա գանք ամենագլխավորին: Եզրափակչից րոպեներ անց, երբ դեռ ժողովրդի լեզվով ասած չէինք մարսել այդքան կանխատեսելի 18-րդ հորիզոնակը, Արծվիկը, կրկնվեմ' միայն Հանրայինին հատուկ պնդերեսությամբ, ֆեյսբուքյան իր էջում հետևյալ գրառումն արեց. «Շնորհակալ եմ երազանքս իրականություն դարձնելու համար: Սիրում եմ բոլորիդ»:

Արծվիկ, այս խայտառակությո՞ւնն էր Ձեր երազանքը, մենք մտածում ենք 18-րդ հորիզանականի մասին, իսկ Դուք' շնորհակալություն հայտնում: Միգուցե ավելի տրամաբանական կլիներ, որ ներողություն խնդրեիք' թեկուզ հույսերը (եթե, իհարկե, որևէ մեկը հույս ուներ) չարդարացնելու համար:

Արծվիկի միակ տրամաբանական քայլը, թերևս, այն էր, որ այս շնորհակալական գրառումը տեղադրելուց անմիջապես հետո հեռացրեց այն' երևի հասկանալով, որ սա երազանքի իրականացում չէր, սա ԽԱՅՏԱՌԱԿՈՒԹՅՈՒՆ էր, որի համար արժեր շնորհակալություն հայտնել միայն Հանրայինին, որ մեր' հարկատուներիս հաշվին իրականացրեց Ձեր երազանքը:

Հեղինակ' Ա. Գրիգորյան

asekose.am