Շիրակի դպրոցի ռազմագիտության դասարանը կկրի Թալիշում զոհված Գոռ Գարեգինյանի անունը

Շիրակ գյուղի միջնակարգ դպրոցի ռազմագիտության դասարանը մայիսի 18-ին անվանակոչվեց փետրվարի 6-ին Թալիշում զոհված 19-ամյա զինծառայող Գոռ Համազասպի Գարեգինյանի անվամբ։

Գոռը Շիրակի մարզի Շիրակ գյուղից էր: Ընտանիքի երկար սպասված անդրանիկ զավակը: Աշխույժ ու անհանգիստ բնավորությամբ առանձնանում էր դասընկերներից, խելացի էր, բոլորի կողմից սիրված: Սիրում էր երգել, պարել ու ստեղծագործել: Բարձր գնահատականներով դպրոցն ավարտելուց հետո որոշում է, որ կգնա բանակ, կվերադառնա ու կօգնի ծնողներին մեծացնելու իր 2 կրտսեր եղբայրներին:

Գոռի հայրը՝ Համազասպ Գարեգինյանը, նշում է, որ զորակոչվելուց հետո՝ ծառայության ընթացքում, երբեք չի տրտնջացել ու չի դժգոհել, միշտ կապը պահել է ծնողների հետ ու ասել՝ «ամեն ինչ շատ լավ է»: Փետրվարի 6-ին, ժամը 11:00-ի սահմաններում, սակայն, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից հրադադարի ռեժիմի խախտման արդյունքում, Գոռը մահացու վիրավորում է ստացել: Գոռ Գարեգինյանը հետմահու պարգեւատրվել է «Մարտական ծառայություն» մեդալով:

Գոռին այսօր ողջ գյուղն է հիշում, իսկ դպրոցականների համար դպրոցում Գոռի անունը կրող դասարանն ու հերոս զինվորի մասին պատմող անկյուն ունենալը պատիվ է: Ի հիշատակ Գոռ Գարեգինյանի կազմակերպված փոքրիկ միջոցառումը փաստում էր՝ Գոռը կենդանի է ու իր հայրենասիրությամբ բոլորի կողքին: Հիշատակն անմահացնող անկյունը նաև հայրենասիրություն է սերմանում: «Երեխաները փոխվել են, ավելի զգոն ու հայրենասեր են դարձել: Գոռի անունով դասարան ունենալն ամենաքիչն էր, որ մենք կարող էինք անել»,-նշեց դպրոցի տնօրեն Հասմիկ Քոչարյանը՝ մանկավ արժների և բոլոր գյուղացիների անունից շնորհակալություն հայտնելով Գոռի ծնողներին նման հայրենասեր որդի դաստիարակելու համար: