Համացանցում անձնական տվյալների արտահոսքից խուսափելու համար պետք է բարձրացվի հասարակության իրազեկվածությունը. Դոյդոյան

Սոցիալական ցանցերում անձնական տվյալների անցանկալի արտահոսքից խուսափելու համար առաջին հերթին պետք է բարձրացնել հասարակության իրազեկվածության մակարադակը: Այս մասին ասաց Անձնական տվյալների պաշտպանության գործակալության պետ Շուշան Դոյդոյանը:

«Համացանցային տիրույթում անձնական տվյալների պաշտպանությունը դժվար իրագործելի է: Առաջին հերթին պետք է անձը գիտակցի, որ համացանցում անձնական տվյալները չպետք է դարձնել բոլորին հասանելի: Անձնական տվյալը միմիայն օգտատիրոջն է, և որևէ մեկը չի կարող առանց վերջինիս ցանկության տնօրինել այն:

Եթե, այնուամենայնիվ, անձնական տվյալների տարածման խախտումներ են գրանցվում, գործակալությունը դիմում է տվյալ սոցիալական ցանցի ադմինիստրացիային՝ խնդրելով ջնջել կամ սահմանափակել այս կամ այն նյութը, որը պարունակում է անձնական տվյալի մասին տեղեկություն»,- ասաց Դոյդոյանը:

ՀՀ արդարադատության նախարարի ժամանակավոր պաշտոնակատար Արթուր Հովհաննիսյանը նշեց, որ եթե անձը սոցիալական ցանցում հրապարակում է իր անձնական տվյալները կամ նկարը պետք է գիտակցի, որ այդ տվյալները վերահսկելի չեն:

«Դա նշանակում է, որ անձն իր համաձայնությունը տվել է, որ այդ տվյալները հասանելի լինեն հասարակության համար: Իսկ եթե օգտատերն իր անձնական տվյալների տեսանելիությունը սահմանափակում է, և որևէ մեկը կոտրում է այդ պաշտպանությունը` այս պարագայում մենք գործ ունենք անօրինական գործողությունների հետ»,- նշեց Հովհաննիսյանը: