Մոսկվան զսպում է Բաքվին…

Մայիսի 23-ին ՀՀ ՊՆ պաշտպանական քաղաքականության վարչության պետ Լևոն Այվազյանը բավական ուշագրավ ասուլիս էր տվել, որտեղ խոսել էր հարցերի մասին, որոնք ուղղակիորեն առնչվում են Հայաստանին ներկայում հուզող թիվ մեկ խնդրին՝ անվտանգությանը. խոսք էր գնացել ՌԴ կողմից Հայաստանին մատակարարվող զենքերի, Հայաստանի մի շարք երկրներում խաղաղապահ առաքելություններին ունեցած մասնակցության և այլնի մասին: Բանախոսը շեշտել էր, որ առաջիկա տարիներին Հայաստանը զինատեսակների նոր խմբաքանակ կստանա Ռուսաստանից, ինչը ներառում է և 200 մլն դոլար վարկային ծրագիրը, և ընթացիկ համագործակցությունը:

Բացի սա՝ «Սպուտնիկ» գործակալության հետ զրույցում ՌԴ ռազմատեխնիկական համագործակցության դաշնային ծառայության ղեկավար Դմիտրի Շուգաևն էլ հայտարարել էր, որ ՀԱՊԿ անդամ պետությունները առաջիկայում սպառազինությունների նոր տեսակներ են ստանալու Ռուսաստանից՝ ուղղաթիռներ, հակաօդային պաշտպանության համակարգեր, ինչպես նաև զրահապատ տրանսպորտային միջոցներ:

Ավելին՝ պարզվում է՝ ՀԱՊԿ գլխավոր քարտուղարի տեղակալ Վալերի Սեմիրիկովն էլ իր հերթին հայտարարել է, որ ՀԱՊԿ-ի շրջանակներում առաջիկայում կարող է իրականացվել ծրագիր ՀԱՊԿ անդամ պետությունների արագ արձագանքման ուժերին անվճար զենք մատակարարելու նպատակով:

Ռուսաստանի կողմից Հայաստանի զինված ուժերը հզորացնելու ձգտումն, անկասկած, պայմանավորված է մի շարք խորքային հանգամանքներով. միանշանակ է, որ ՌԴ նկատվող շահագրգռվածությունը` հնարավորինս պատշաճ կերպով զինելու Հայաստանի բանակը, պայմանավորված է հատկապես հետևյալով` նախ` խնդիր կա հայկական ռազմաքաղաքական գորածոնի հզորացման արդյունքում կանխել Բաքվի անժամանակ ագրեսիան, որն ուղղակի հօդս կցնդեցներ Կրեմլի պլանները, երկրորդ` քայլ է կատարվում նաև ՀԱՊԿ կազմակերպության հզորացման ուղղությամբ, ինչն ուղղակի ակնարկ է Արևմուտքին առ այն, որ Ռուսաստանը լուրջ է տրամադրված այս կառույցի նկատմամբ ու անելու է ամեն հնարավորը` հասնելու կառույցի կայացմանը. Արևմուտքը պետք է գիտակցի, որ անդամ երկրները մեկ թիմ են ու վայելում են ՀԱՊԿ առաջնոդ երկրի հովանավորությունը: Ասել կուզի` ՀԱՊԿ անդամ երկրների հանդեպ ՌԴ հոգատարությունը նաև որոշակի փիառի էլեմենտներ է իր մեջ պարունակում:

Պետք է մեկ բան հասկանալի լինի` իրականում ռուսական զենքերի մատակարարումը Հայաստան կամ հայկական ռազմաքաղաքական գործոնի հզորացումն Անդրկովկասում չափազանց հեղհեղուկ երևույթներ են. Ռուսաստանը կարող է մի քանի շաբաթում փոխել ուժերի հարաբերակցությունը տարածաշրջանում, ինչպես մեր, այնպես էլ ազերիների օգտին.եթե տվյալ պահին պահանջվում է զինել հայկական կողմին, ապա կզինեն, եթե ասենք մեկ տարի հետո անհրաժեշտ կլինի Բաքվին գերժամնակակից մահաբեր զենք վաճառել, ապա ոչինչ Կրեմլին չի խանգարի անել դա: Սա աշխարհաքաղաքականություն է, պարոնա՛յք, ուր գլխավորը նպատակներն են, բայց ոչ երբեք միջոցները…

Դավիթ ԲԱԲԱՆՈՎ