ՀՀ-ում երեխաներին թրաֆիքինգի և սեռական բռնության են ենթարկել. Նելլի Դուրյան

ՀՀ ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանն այսօր հրավիրված մամլո ասուլիսի ընթացքում ներկայացրեց ամփոփ վիճակագրություն երեխաների իրավունքների պաշտպանության վերաբերյալ: ըտ ոստիկանության պաշտոնյայի՝ 2017 թվականների 4 ամիսների ընթացքում երեխաների նկատմամբ կատարվել է բռնության 59 դեպք՝ նախորդ տարվա 71-ի դիմաց: Ընտանեկան բռնության դեպքերը 4-ն են, նախորդ տարվա թիվը պահպանվել է: «Եթե համեմատում ենք նախորդ տարվա դեպքերի հետ, տեսնում ենք, որ բռնության դեպքերի նվազում կա, սակայն դա մեզ չի գոհացնում, անելու ենք ամեն ինչ՝ դա ընդհանրապես բացառելու համար, իսկ բացառել կարող ենք միայն կանխարգելիչ միջոցառումների շնորհիվ»,- ասաց Նելլի Դուրյանը:

Վերջինիս փոխանցմամբ՝ դպրոցներում ոստիկանական տեսուչների աշխատանքի շնորհիվ կրթական օջախներում բռնության դեպքերը նվազել են և ամենօրյա աշխատանքի շնորհիվ հնարավոր է լինում խուսափել անչափահասների նկատմամբ բռնության ցանկացած դրսևորումից: ԼՈւՐԵՐ.com-ի հարցին՝ բռնության դեպքերի զգալի մասը Երևանի՞ն, թե՞ մարզերին է բաժին ընկնում, բանախոսը պատասխանեց. «Դեպքերի առյուծի բաժինը Երևանում է արձանագրվում: Միայն այս տարի Երևանում հայտնաբերվել են երեխաների թրաֆիքինգի, սեռական բռնության դեպքեր և հիմա  քննություն է ընթանում այդ ուղղությամբ»: 

«Ցանկանում եմ նշել սակայն, որ կան նաև երեխաների իրավունքների ոտնահարման դեպքեր, որոնք  այդքան էլ չեն վերաբերում ոստիկանությանը: Դրանք այն  երեխաներն են, որոնց իրավունքները ոտնահարվում են, երբ ծնողները բաժանվում են և երեխան նախկին ամուսինների միջև դառնում է կռվախնձոր:  Շաբաթվա կտրվածքով ունենում ենք երկու-երեք նման դեպք և այս խնդիրն օրեր առաջ բարձրացրեցինք նաև ՄԱԿ-ի ամբիոնից»:

Խոսելով առավել խոցերի խմբերի մասին՝ Նելլի Դուրյանը նշեց, որ ոստիկանության տեսադաշտում են հայտնվում ծնողներից մեկի հետ ապրող տղաներն ու աղջիկները: Դեռահասության շրջանում առկա խնդիրները ծնողները շատ հաճախ չեն կարողանում լուծել և այդ դեպքում երեխան հայտնվում է ոստիկանության ուշադրության կենտրոնում: «Այս դեպքում երեխաներին օգնության են հասնում դպրոցներում աշխատող ոստիկանական տեսուչներն, ովքեր մշտապես զրուցում են երեխաների հետ: Եղել են բազմաթիվ դեպքեր, երբ երեխաները կիսվում են իրենց խնդիրներով ոստիկանների հետ և այդ դեպքում հնարավոր է լինում բռնության և երեխայի իրավունքի ոտնահարման դեպքը կանխարգելել»:  

Աղավնի Սուքիասյան